Wenke om jou grimering te verwyder
Laat jou vel asemhaal met verfrissende grimeringverwyderaars
LIPPE
Langdurende en mat lipstiffie is soms moeilik om te verwyder. Die tegnologie daarvan is geskep om alles te deurstaan wat jy bedags met jou lippe doen. Soms verg dit ’n paar ligte vrywe met ’n grimeringverwyderaar wat matig maar sterk genoeg is om hardnekkige lipstiffie te verwyder. Jy kan ook petroleumjellie oor die lipstiffie aanwend voor jy dit verwyder. Vee dit dan af met grimeringverwyderingslappies of watte wat met grimeringverwyderaar deurweek is. Bevog jou lippe dadelik daarna met lipsalf of petroleumjellie om dit gehidreer te hou.
OË
Gesigvel is baie delikaat, maar dié om die oë is selfs dunner en broser. Ooggrimeringverwyderaars word spesifiek geformuleer om die vel om die oë te versorg. En omdat jy min moet vryf, los die grimeringverwyderaar die grimering aan die oë op sonder dat jy te veel werk hoef te doen. Om die grimering doeltreffender te laat oplos, week watte of ’n wattekussinkie met ooggrimeringverwyderaar en hou dit ’n paar sekondes oor die oog. Vee dan met so min drukking moontlik met die watte oor die oog. Herhaal dié stap om van die oorblywende grimering ontslae te raak.
GESIG
Grimering dring binne tot in die vel se porieë, en as dit nie behoorlik verwyder word nie, kan dit verstop en probleme veroorsaak, soos swartkoppies en vergrote porieë. Grimeringverwyderaars word saamgestel om die grimering van die vel te help verwyder en dit terselfdertyd te bevog. Maar omdat elkeen se vel anders is, is dit toelaatbaar om jou gesig met ’n matige reiniger te was nadat jy jou grimering verwyder het om ander vuiligheid van jou vel te verwyder as jy voel dit is nodig. Wanneer jy grimering verwyder, moenie meer as drie keer oor dieselfde plek vee nie, want dit kan die vel irriteer en dit rooi of droog laat raak.