Regslui staan bont in Joost-boedelstryd
In die twis oor Joost se boedel veg swaargewigprokureurs om hul kliënte se belange te beskerm
SKAARS het die ontslape oud-Bokheld Joost van der Westhuizen sy laaste asem uitgeblaas, toe bars die stryd om sy aardse besittings los. Dit is nou ses maande later en die bittere boedelstryd woed steeds voort tussen die regspanne van Joost se familie en dié van sy vervreemde vrou, die sangeres Amor Vittone.
Te midde van die onenigheid oor Joost se laaste wilsbesluit het Amor boonop dreigbriewe ontvang en is ’n opname uitgelek van ’n beweerde gesprek waarin sy na bewering haar siek en verswakte man uitskel.
Weens dié opspraakwekkende gebeure in die voortslepende sage ná Joost se dood moet die prokureurs in die Van der Westhuizen- en Vittone-kamp nou bontstaan om nimmereindigende navrae, onderhandelings en dramatiese wendings te hanteer. Dié ervare regslui se bekende kliënte hou hulle nou so besig dat hul name gereeld in media berigte oor Amor en die Van der Westhuizens pryk.
Ferdi Hartzenberg. Ulrich Roux. Sean Hefferman. Dié prokureurs se name sal nou vir ewig deel wees van die verhaal van Joost van der Westhuizen en Amor Vittone.
AMOR wou na bewering ure ná Joost se dood op 6 Februarie by die Van der Westhuizen-familie weet watter voorsiening Joost vir haar en die kinders gemaak het. Sy is immers die ma van hul twee minderjarige kinders, Jordan (13) en Kylie (11), en sy en Joost was ten tyde van sy dood binne gemeenskap van goedere getroud. Amor voer aan Joost het haar en die kinders deurentyd beloof hulle sal versorg wees.
Aanhangers van die vervreemde glanspaar het gedink Joost, by wie motorneuronsiekte (MNS) reeds in 2011 gediagnoseer is, se testament is gereed vir die onafwendbare, vir sy sterfdag. Maar dit blyk toe nie so eenvoudig te wees nie. Amor het twee maande ná sy dood met ’n skok uitgevind volgens sy laaste testament, een waarvan sy glo geen kennis gedra het nie, erf die kinders alles en sy niks. Volgens die testament wat sy en Joost in 2009 saam onderteken het, erf die langslewende gade (in dié geval Amor) alles. By die langslewende gade se afsterwe sal alles gaan na die kinders wat die langslewende gade oorleef. Maar dit was voor die seksvideobom wat in Maart daardie jaar gebars het en voor die skokdiagnose van MNS in 2011.
In die eerste ronde van die geveg oor Joost se boedel het die meester van die hof Joost se laaste testament, wat in September 2015 opgestel is, verwerp en op 18 Julie vanjaar die testament wat Amor en Joost saam in Augustus 2009 onderteken het, aanvaar. Die meester het bepaal die laaste testament is nie deur Joost self onderteken nie en dit het ook nie aan die alternatiewe wetlike vereistes voldoen omdat hy weens sy siekte nie self daartoe in staat was nie. Die familie het aanvanklik aangedui hulle gaan die saak daar laat. Amor was gerus. Maar nou lyk dit asof die einde van die sage nog nie noodwendig aangebreek het nie.
Die Van der Westhuizens het die afgelope maand Joost se jare lange prokureur, vriend en vertroueling, Ferdinand (Ferdi) Hartzenberg, in die pad gesteek en twee nuwe vuurvreter-regspanne aangestel. Die swaargewigte in die Van der Westhuizen-kamp is onderskeidelik die strafregprokureur Ulrich Roux van BDKprokureurs en die mediaregspesialis Dario Milo van Webber Wentzel, albei van Johannesburg. Ulrich se taak is glo om Joost se boedel “in die guns van sy kinders” te beredder en Dario s’n, volgens Ulrich, om die twis en Amor se uitlatings in die media te hanteer. Dario het navrae na Odette Schwegler, die familie se woordvoerder, verwys, maar sy wou nie bevestig wat sy opdrag is nie.
“Ek gaan sterk staan,” is al wat Amor by navraag aan Huisgenoot wou sê. Sy het benadruk sy wil nie baklei nie en het vrede in haar hart. Sy voel gerus met haar getroue regsverteenwoordigers, Sean Hefferman en Louis Baartman van LP Baartman-prokureurs, aan haar sy.
Net toe dit lyk asof onderhandelings agter toe deure gaan plaasvind, is die omstrede klankopname van wat glo ’n telefoongesprek tussen Amor en Joost is, anoniem aan die media uitgelek. In die opname, wat na bewering in 2014 ge-
maak is, klink dit asof Amor vir Joost uitskel. Die uitgelekte opname het Amor se regspan warm onder die kraag en hulle wou weet: Hoekom nou?
Die Van der Westhuizens het enige betrokkenheid by die verspreiding of uitlek van die opname ontken. Volgens Ulrich is onderhandelings om tot ’n vergelyk oor die twee testamente te kom steeds aan die gang. “Natuurlik wil ons hê die laaste testament (van 2015) moet aanvaar word,” het hy gesê.
Indien hulle nie die laaste testament verder betwis nie, wil die Van der Westhuizens hê Amor moet net die helfte van die boedel in die 2009-testament kry. “Dit sou haar in elk geval toekom aangesien hulle binne gemeenskap van goedere getroud was,” verduidelik Ulrich. Die familie wil hê die ander helfte van die boedel moet in die J9-trust, waarvan die kinders in dié stadium die enigste begunstigdes is, geplaas word. Al Joost se waardevolste bates is in hierdie trust, wat niks te doen het met Joost se J9-stigting, wat hom vir MNS-lyers beywer, nie. Odette het vroeër bevestig dit sluit onder meer twee ten volle betaalde eiendomme in die luukse Dainfern-landgoed in Johannesburg, juwele, “’n aansienlike bedrag geld” en al sy memorabilia in. ’n Erf in die Drakensberge is ook in die gesamentlike Amor-en-Joost-trust.
Sean het teen druktyd aan Huisgenoot bevestig hulle onderhandel steeds met die Van der Westhuizens se regspan, maar wou nie verder kommentaar lewer oor die pad vorentoe nie.
Sal die onderhandelings verder vreedsaam geskied of gaan die stryd nog in die hof draai? Net die tyd sal leer, maar een ding is seker: Die prokureurs wat agter die skerms woeker om hul kliënte se belange te beskerm, het hul hande vol.
DIE VAN DER WESTHUIZENS SE KAMP Mandaat beëindig: Ferdi Hartzenberg
Ferdi se praktyk spesialiseer in handels- en siviele reg, maar hy is bekend daarvoor dat hy al verskeie bekendes verteenwoordig het. Ferdi het vroeër jare vir die rugbyheld Joost én sy vrou, Amor, opgetree. Later was hy net Joost se prokureur. In 2009 was Ferdi betrokke toe bekendes regstappe wou doen omdat hulle ontevrede was oor dele in die joernalis Yolanda Barnard se boek, Die Ponies Galop. Ferdi het al namens die sangers Rudi Claase en Kobus Muller op- getree, asook die akteur Frank Opperman. Hy het sy praktyk, waar verskeie vennote en kandidaatprokureurs ook werk, in 1999 in Pretoria begin.
Nuut aangestel: Ulrich Roux
Ulrich, ’n strafregkenner en direkteur van BDK-prokureurs in Johannesburg, is in Julie deur Joost se familie aangestel. Die publiek sal Ulrich onthou as die aantreklike regskenner wat in 2014 en 2015 links en regs harte gesteel het toe hy in sy pak en das op TV verskyn om sy regskennis tydens die saak teen Oscar Pistorius te deel. Sedert hy op die sogenaamde Oscar-kanaal verskyn het, is hy dikwels op die kassie te sien waar hy oor wetlike kwessies praat. Toe Huisgenoot twee jaar gelede vir ’n profielartikel met hom gesels, was Ulrich op 31 die jongste van BDK se vyf direkteurs. Sy pa, André, was ’n advokaat, sy ma, Miki, het as prokureur gekwalifiseer en ousus Philna het ’n regsgraad.
In sy loopbaan was hy al by opspraakwekkende sake betrokke, soos dié van Radovan Krejcír, die vermeende Tsjeggiese “mafiabaas”, en ook die Blou Bulstut Bees Roux, wat in 2011 ’n pleit- en vonnisooreenkoms met die staat aangegaan het. Dit was nadat hy skuld beken het op ’n aanklag van strafbare manslag.
Die mediaregspesialis: Dario Milo
Kliënte van dié regsman van die regsfirma Webber Wentzel sluit satirici soos die komediant Conrad Koch en die spotprentkunstenaar Zapiro in. Hy het Conrad verteenwoordig toe sy buikspreekpop, Chester Missing, die sanger Steve Hofmeyr in 2014 in die sosiale media takel. Steve het toe ’n interdik teen Conrad gekry.
Dario het ook die Goodman-galery verteenwoordig toe die galery die skildery The Spear uitgestal het wat ’n naak- te pres. Jacob Zuma uitbeeld. Wanneer hy nie in die hof is nie, gee Dario klas by die Universiteit van die Witwatersrand, waar hy ’n medeprofessor aan die regsfakulteit is. Hy het ook die boeke Defamation and Freedom of Speech en A Practical Guide to Media Law geskryf.
Die woordvoerder: Odette Schwegler
Odette tree deesdae op as die Van der Westhuizenfamilie se woordvoerder nadat sy jare lank Joost se woordvoerder was. Sy het ’n lang pad met Joost en sy familie gestap toe sy die dokumentêre fliek Joost: Spel van Glorie vervaardig het. Die fliek is in 2014 vir die eerste keer by die Silwerskermfees in Kampsbaai vertoon en is eindelik in Augustus 2015 amptelik uitgereik.
Odette was regisseur van dié fliek, waarin Joost oor sy lewe en sy stryd teen MNS praat. Sy het saam met Joost geskryf aan die boek Glory Game, wat handel oor sy lewe en siekte. Dit is verlede jaar gepubliseer en bied ’n blik op wat agter die skerms gebeur het tydens die verfilming van die rolprent. Sy is medeeienaar van die produksiehuis Blink Pictures.
Sean Hefferman (op foto) en Louis Baartman
Sean was ’ n matrikulant aan die Hoërskool Centurion en het aan Tukkies regte studeer. In 2015 het hy sy meestersgraad deeltyds verwerf.
Volgens sy LinkedIn-profiel stel hy veral belang in menseregte, opvoeding, kinders en die omgewing.
Hy het tot in 1999 sy eie firma bedryf, was daarna by ander regsfirmas betrokke en het in 2015 aangesluit by LP Baartman, waar hy ’n vennoot is. Hy hanteer al die medianavrae oor die stryd rondom Joost se boedel.
Louis, eienaar van LP Baartmanprokureurs, is in 1997 as prokureur toegelaat. Hy het twee jaar later Baartman Bosman & Van Rensburg-prokureurs op die been gebring. Die vennootskap het in 2009 ontbind en hy het daarna die nuwe Centurionse aktebesorging en litigasiefirma LP Baartman-prokureurs begin. Hy is saam met Sean ’n steunpilaar vir Amor in dié hoëprofiel-boedeltwis. EKSTRA BRONNE: NEWS24.COM, IOL.CO.ZA