BESKINDER DEUR EIE KÊREL
Ek en my kêrel is amper vyf jaar saam en in hierdie tyd het hy my dikwels met ander vroue verkul. Ek betaal die meeste van ons rekenings, iets waaroor twee van sy ekse ook kla.
Nou het iemand my vertel my kêrel versprei stories oor ons verhouding. My bron het dit by my kêrel se nuutste ander meisie gehoor. Ek kry haar en my kêrel toe saam en vra hulle of dit waar is. Nou verkwalik hy my dat ek hom nie alleen daarmee gekonfronteer het nie en maak my sleg.
Was ek verkeerd? Ek sal my lewe vir hom opoffer. Moet hy nog ’n kans kry?
RW op BF
Beslis nie! Kan jy dink watter gevare sy rondlopery vir jou gesondheid inhou? Seksueel oordraagbare siektes is ’n werklikheid as jy ’n maat met so ’n verlede en hede het. Jy kan jou nie langer hieraan blootstel nie. Laat jou dadelik daarvoor toets.
Jy kan dié man nie langer in jou lewe en in jou bed toelaat nie. Hy het jou emosioneel reeds ernstige skade berokken en jou oordeel so belemmer dat jy hierdie onuithoudbare situasie verduur. Jy verdien veel beter as om by hierdie skinderbek en manipuleerder se dramas en dubbele lewe betrek word.
As jy bereid is om als vir een mens op te offer om sy goedkeuring en aandag te kry, kan dit ’n teken wees van ’n medeafhanklike persoonlikheid. Gewetenlose maats span maklik so iemand vir eie gewin in, terwyl hulle oor hul maat se skouer bly loer na ander moontlikhede.
Weerhou jou ’n jaar van enige romantiese en seksuele verhoudings tot jy voel jy kan bloot vriende wees met iemand wat jou nie emosioneel misbruik nie. Jy hoef niemand se slagoffer te wees of die redder wat sy rekenings betaal nie. Wees ’n volwaardige mens wat deur vriendskappe sterker in jouself kan word tot jy om die regte redes ’n verhouding met ’n eerbare mens kan aanknoop wat tot ’n verbintenis kan lei.