DIE MOOISTE AFRIKAANSE CHRISTELIKE GEDIGTE
Saamgestel deur CAS VOS (Lux Verbi, R280)
Daar is meer poësie in die sneeuvlokkie as in die letterkunde en baie meer poësie in die miskruier in die toktokkie in die meteorologie en entomologie in die moremis en in die bergpiek die horison wat in die hemel wegraak in die rooswolk is daar baie meer liriek die aarde is deur ’n digter gemaak T.T. Cloete se God die Digter is een van die bekende gedigte wat byeengebring is vir hierdie besonderse bundel. Verskeie ander digters wat net soos Cloete bekend is vir hul geestelike verse is hier opgeneem, onder andere Sheila Cussons, Lina Spies, I.L. de Villiers en Petra Müller.
Hier is ook digters wat ’n mens nie noodwendig in hierdie genre sou verwag nie, maar wat wel die spirituele wêreld roerend betree.
“Al is al die gedigte in die bloemlesing nie noodwendig streng ge- sproke Christelik van aard nie, is almal wel deeglik versoenbaar met die Christelike oortuigings,” verduidelik Cas Vos, teoloog en self digter, in sy voorwoord.
Hy skryf hierdie versamelde gedigte is ’n “swart leertas” aan elke leser wat hy kan saamneem om hom voor te berei op die lang, onbekende reis van die lewe.
Daar is verfrissende jong stemme, soos dié van Ronelda Kamfer met haar skrynende ’ n Gewone Blou Maandagoggend, Loftus Marais se uitdagende Wederkoms, en Carina Stander se Bid.
Die bundel sal in die smaak val van mense wat eerstens van gedigte hou, tweedens van ’n Christelike aanslag en derdens nie van soetlikheid nie. En wat kans sien vir die onvoorspelbare, soos die slot van Nathan Trantraal se gedig Moenie vi Hulle Sê Ôs Gan Ie, Annes Wil Hulle Saamkom: Soms voel ek jammer vi ôs Ek kan sien hoe ôs rêrag moes gelyket en hoe die engele moes gelagget virrie country bumpkins Die laaste mense om yt te vinne Jesus het lankal gekom en hy is wee hie weg, sône ôs