Duduzane Zuma se verdagte sake
Zuma se seun Duduzane het onlangs na Gordhan gekap enn vir die Guptas opgekom. Maar sy eie naam duik telkens opp in die staatskapingsdrama . . .
SUID-AFRIKA se nuutste stem teen korrupsie, begunstiging, wanbestuur en onbevoegdheid kom uit ’n onverwagte oord: die Zuma-kamp. Die president se seun Duduzane Zuma (35) het onlangs luidkeels teen dié onheilighede geprotesteer, skynbaar uit besorgdheid oor deursigtige regering en die land se armes. Hy het in ’n ope brief aan Pravin Gordhan, die oudminister van finansies, so tekere gegaan en in ’n BBC-onderhoud hom so vroom gehou, ’n mens sou sweer hy was nog nooit ’n hooffiguur in die voortslepende staatskapingsage nie.
In sy brief beskuldig hy Pravin daarvan dat hy staatsinstellings misbruik het om hom wat Duduzane is en sy “sakekollegas te probeer vernietig . . . met geen bewys van wangedrag nie”. Pravin is ’n “samesweringsteoretikus” en “verantwoordelik vir ons ekonomiese probleme”.
In die BBC-onderhoud vertel hy die Guptas het nooit die afgedankte adjunkminister van finansies, Mcebisi Jonas, probeer omkoop nie. Voorts het nóg hy nóg sy pa ’n woonplek in Doebai. En met ’n laggie verseker hy kykers hy is geensins korrup nie.
Waarom sou JZ se stralerjakkerseun nou skielik sy hart uitstort? Dit is desperaatheid, sê prof. Hussein Solomon, politieke wetenskaplike aan die Universiteit van die Vrystaat: “Die hele Guptasakeryk is ernstig in die knyp.”
Die brief kom “nadat die Guptas en Duduzane se bankrekenings gesluit is; hulle kan nie sake doen nie. Hulle verkeer onder druk uit alle oorde, van burgerlike groepe tot hofsake wat oor hul kop hang. Selfs Zuma se bondgenote besef watter albatros hy is en wil hom reeds in Januarie as president sien waai.”
Duduzane se optrede verteenwoordig volgens Hussein “die laaste stuiptrekkings van ’n netwerk van korrupsie. Hulle kan steeds skade doen. Maar die ANC spits hulle toe op ’n postZuma-era.”
Hier is van Duduzane se beweerde verdagte bedrywighede.