Sterre skei as een meer skitter
Talle glanspare se paaie skei wanneer die een suksesvoller voller as die ander raak
WANNEER ’n glanspaartjie se paaie skei, dink ’n mens dadelik dis oor een van die twee die ander verkul, hul besige werkroosters of die lang tye weg van mekaar.
Maar daar is soms ’n ander rede, een wat nie dikwels hardop erken word nie: mededingendheid. Wanneer een maat beroemder as die ander raak, soos in die geval met die Hollywood-akteurs Anna Faris (40) en Chris Pratt (38), gaan die liefde dikwels by die agterdeur uit.
Toe die twee mekaar in 2007 ontmoet, was die fyn geboude blondine “die beroemder en sexier” een, vertel ’n bron. Dit was danksy haar rolle in die Scary Movie-fliekreeks, Just Friends (2005) en The House Bunny (2008). Chris was bekend vir sy rol as die dierbare, oorgewig Andy in die sitkom Parks and Recreation.
Maar dinge het begin verander toe hy gewig afskud en spiere bou vir die lokettreffers Guardians of the Galaxy (2014) en Jurassic World (2015).
Die televisie-bleeksiel het as ’n aantreklike rolprentheld ontpop, en die aanbiedings het ingestroom. “Hy het ’n groot filmster geword en Anna het nie groot rolle gekry nie,” vertel iemand in die binnekring aan Us Weekly, en voeg by die twee het nog altyd met mekaar “meegeding. Wanneer hulle in ’n groep uithang, wil elkeen die een wees wat die snaaksste grap vertel. Toe hy eindelik ’n deurbraak maak, het dit die spanning in die verhouding laat toeneem.”
Dis ’n algemene verskynsel onder rykes en beroemdes. “Egskeidingspraktisyns verwys dikwels daarna as mededingende-ego-sindroom,” sê Vanessa LloydPlatt, ’n Britse egskeidingsprokureur. “Wanneer een maat suksesvoller as die ander raak of die ander een nie genoeg aandag trek nie, raak hulle gefrustreerd en haal die woede op mekaar uit.”
Anna en Chris is nie die eerste glanspaartjie wie se mededingende aard in die pad van huweliksgeluk gestaan het nie. Hier is nog ’n paar.