WAT SÊ DIE REG?

Wanneer regte teen mekaar opgeweeg word, hang dit van die omstandighede af watter reg die swaarste sal weeg, sê prof. Anneliese Roos, ’n regskenner aan Unisa.

“In dié geval sal testeervryheid (die reg om met jou goed te maak soos jy wil) swaarder weeg (as geslagsgelykheid). Die oupagrootjie kon al sy besittings aan vreemdes nagelaat het as hy wou en die reg sou daaraan gevolg moes gee.”

Carel de Jager het waarskynlik nie gedink sy dogters sou kon boer toe hy die testament opstel nie, meen Anneliese. Hoewel die meeste vroue hierdeur gebelg sou voel, is dit nie volgens wet genoeg rede om die bestaande regsreëls te verander nie, sê sy.

Anneliese sê vroueregte sal wel die swaarste weeg in ’n saak waar die openbare belang ter sprake is, byvoorbeeld as geld bemaak word aan ’n trust wat beurse aan slegs manstudente gee.

Bepalings wat met ’n begunstigde se huwelikstatus inmeng, kan ook betwis word, soos as ’n testateur sou bepaal sy dogter mag net erf as sy van haar man skei. “Sulke bepalings druis teen die goeie sedes in en sal nie aan gevolg gegee word nie.”

Adv. Kosie Olivier van Kaapstad sê die saak is ongetwyfeld een wat eindelik in die konstitusionele hof kan gaan draai, waar dan sal besluit moet word of die bepaling onkonstitusioneel is.