The Emoji Movie

Animasie. Met die stemme van T.J. Miller en James Corden. Regisseur: Tony Leondis. O. Begin op 22 September.

Waaroor gaan dit?

Emoji’s is natuurlik daardie ikoontjies op jou selfoon van glimlaggende of betraande gesiggies waarmee jy jou gevoelens in ’n kits weergee. Maar dié fliek speel af in ’n selfoonwêreld waar elke emoji altyd presies dieselfde uitdrukking het. Tog is een emoji anders, want hy kan nie sy gesig uitdrukkingloos hou nie. Wat moet hy doen om tussen die ander goggonoppers in te pas?

Wie sal hiervan hou?

Beslis nie volwassenes nie. The Emoji Movie is uiteraard nie vir dinosourusse gemaak nie, maar uit watter oogpunt ’n mens ook al na hierdie poging kyk, dit bly pynlik. Dit is so ’n warboel van style en ’n gegil en rondhollery dat jou kop soos ’n woer-woer begin tol. Om by te hou verg soveel inspanning dat volwassenes uit die teater sal vlug.

Pikkies wat met ’n selfoon kan werk voor hulle kan praat, kan ’n bietjie meer plesier hieruit kry.

Maar selfs vir hulle, wat immers gereeld bederf word deur flieks met uitstekende animasie en goeie storielyne, kan hierdie deurmekaarspul net te erg wees. Hulle kan moontlik nog identifiseer met hul gunsteling-ikone of met die geykte storie van ’n seun wat per slimfoon met sy meisie probeer kommunikeer. Maar sodra die rolprentmakers jou agter die skerm van die slimfoon neem, raak dit so wanordelik dat ’n mens die teater verlaat om iets sterkers as springmielies te soek. Wee die arme ouers wat hierdie rolprent op DVD aanskaf en dan ses keer saam met hul kroos daardeur moet worstel. Jy sal nooit weer ’n lagbekkie in jou lewe stuur nie.

Kyk nou of wag vir DVD?

Nie een van die twee nie. Daar is soveel goeie animasieflieks dat hierdie een soos ’n puisie by ’n matriekafskeid uitsteek.

Soortgelyke flieks

Dit probeer Toy Story, Inside Out en Angry Birds naboots – sonder die geringste sukses.

Springmieliefeit

Die rolprent is op Cannes vertoon. Daar is geen berigte oor hoe die gehoor daarop gereageer het en of dit uitgejou is nie.