SKAKERINGS-VAN-GROEN-SLAAI
Die eenvoudige bestanddele word verhef tot iets spesiaals deur die gebruik van aioli en ’n neuterige strooisel.
GENOEG VIR 4-6 MENSE Bereiding: 15 min. Gaarmaak: 10 min.
KRUIE-AIOLI 3-4 knoffelhuisies 2,5 ml (½ t) seesout ’n hand vol vars gemengde kruie soos grasuie, salie en pietersielie, fyn gekap 2 groot eiergele, kamertemperatuur sap van ’n klein suurlemoen 2,5 ml (½ t) mosterdpoeier 250 ml (1 k) ekstrasuiwer olyfolie STROOISEL 3 groot, rou nori-velle (seegras), grof gekrummel 60 ml (¼ k) elk vlas-, chia-, sonneblom-, pampoen- en sesamsaad 60 ml (¼ k) heuning SLAAI 230 g langsteelbroccoli, in boompies gebreek 400 g murgpampoentjies, in linte gesny met ’n groenteskiller 1 groen soetrissie, in blokkies gesny 1 selderystingel, gekap 125 g suikerertjies 100 g radys, in dun skywe gesny
Voorverhit die oond tot 180 °C. Bespuit ’n bakplaat met kossproei en voer met bakpapier uit.
1 1Kruie- Kruie-aioli aioli Stamp die knoffel saam met die sout in ’n vysel fyn tot ’n pasta vorm. Plaas die knoffelsoutpasta in ’n lang beker saam met die vars kruie en pols met ’n staafmenger tot fyn. Voeg die eiergele, suurlemoensap en mosterdpoeier by en pols weer. Giet die olie stadig in terwyl jy pols tot ’n dik, glansende aioli bereik word.
2 Strooisel Meng al die bestanddele met die heuning tot alles goed bedek en effens klewerig is. Druk die saadmengsel in ’n dun laag op die bakpapier en bak 8 min. tot bros en goudbruin. Plaas eenkant om af te koel. Wanneer dit heeltemal afgekoel het, breek of kap in ’n strooisel.
3 Slaai Plaas die broccoli in ’n glasbak en bedek 2 min. met kookwater. Plaas onmiddellik in yskoue water tot afgekoel. Haal uit en sit op kombuispapier.
4 Verhit ’n roosterpan en rooster die murgpampoentjielinte ’n paar sekondes weerskante, plaas op kombuispapier en sit eenkant.
5 Plaas al die slaaibestanddele op ’n opdienbord, giet die aioli oor en rond af met die strooisel.