Kry so jou plek gereed vir Airbnb
Oorweeg jy dit om jou blyplek op die moderne Airbnb-manier te verhuur? Hier is ’n paar wenke voor jy begin
SEDERT dit die mark nege jaar gelede getref het, het dit gou veld gewen as ’n vindingryke manier om blyplek vir vakansies of sakereise te bespreek. Teen dié tyd is Airbnb deel van ons woordeskat en bied Suid-Afrikaners uit alle vlakke van die bevolking kamers en woonstelle aan toeriste, vakansiegangers en sakelui wat êrens wil oornag sonder dat dit hulle ’n fortuin kos.
Volgens ’ n verslag van Airbnb het 620 000 oorslapers in Suid-Afrika in die 12 maande tot einde Augustus vanjaar daarvan gebruik gemaak. Dis ’n toename van 144% teenoor die vorige jaar. Hiervan was 269 000 plaaslike gaste, wat met ’n volle 204% teenoor die vorige jaar toegeneem het.
“Airbnb sal in Suid-Afrika bly groei en floreer,” voorspel Mariette du Toit-Helmbold, uitvoerende hoof van die toerismebemarkingsagentskap Destinate.
Suid-Afrikaners oral op die maatskaplike spektrum het Airbnb-gashere en -vroue geword – ook in townships soos Soweto in Johannesburg en Khayelitsha en Langa in die Kaap.
Dit gee die ekonomie ’ n hupstoot, meen Velma Corcoran, Airbnb se markkonsultant vir Suider-Afrika. “As Airbnb-gashere word townshipbewoners deel van die toerisme-ekonomie. Dit sal ’n regstreekse uitwerking op hul lewe hê. Hul gemeenskap, plaaslike ondernemings en winkels sal ook daarby baat vind. Airbnb kan uiteenlopende gemeenskappe help ontsluit wat nie tevore vir besoekers toeganklik was nie.”
Airbnb se aantrekkingskrag lê grotendeels daarin dat dit toeriste die kans bied om die plaaslike kultuur eerstehands te ervaar, sê Mariette. “Toeriste soos ons hulle ken, het verander. Hulle soek nie meer ’n tradisionele, eendimensionele vakansie nie en wil nie bloot ontspan nie. Hulle soek egte, betekenisvolle ervarings wat hul lewe sal verryk en hul uitkyk op die wêreld sal verbreed.”
WIE GEBRUIK DIT?
“Die Suid-Afrikaanse toerismebedryf lewer meer as R220 biljoen per jaar op, waarvan R20 biljoen aan verblyf bestee word,” sê prof. Daneel van Lill, hoof van die Universiteit van Johannesburg se skool vir sake en ekonomie.
Met die koms van die Millenniërs, die geslag wat tussen die vroeë 1980’s en vroeë 2000’s gebore is, het Airbnb ’n gaping in die mark raakgesien, sê Mariette. “Dit is een van die wêreldmarkte wat die vinnigste groei. Op die oomblik onderneem Millenniërs 217 miljoen reise per
jaar, en dit sal na verwagting in 2020 tot 320 miljoen reise styg.
“Spoed, avontuur en ervarings waarmee hulle kan spog, dryf hulle, en ook die vryheid om met vakansie spontane besluite te neem. Hulle is goed met tegnologie en hou verskeie apps en sosialemediaplatforms in die oog om hul vakansie te beplan.”
Millenniërs is natuurlik nie al groep onder wie Airbnb gewild is nie; SuidAfrikaners en buitelandse toeriste van alle ouderdomsgroepe gebruik dit nou.
HOE GEMAAK AS JY GRAAG ’N GASHEER WIL WORD?
Dit is belangrik om behoorlike navorsing te doen as jy eiendom wil koop wat jy uitsluitlik vir Airbnb wil gebruik of as jy jou hele huis daarop wil verhuur, sê Ashley James, medestigter van die aanlyn eiendomsagentskap Property Fox.
Ook as jy net ’n spaarkamer in jou huis of die kothuis op jou erf wil verhuur, is dit ongetwyfeld die moeite werd om eers jou huiswerk te doen.
Gaste soek óf verblyf onder een dak saam met plaaslike inwoners óf ’n blyplek waar hulle privaatheid kan geniet.
Kies vyf of ses plekke met soortgelyke verblyf as wat jy moontlik kan bied. Werk dan die gemiddelde koste uit om jou tarief te bepaal. Jy kan ook ’n raps minder as jou mededingers vra.
As die eiendom naby ’n stasie of bushalte is, kan jy jou tarief opstoot, en ook as dit naby ’n lughawe of gewilde besienswaardighede is. Hoe aanlokliker die ligging, hoe meer kan jy vra.
WATTER REGULASIES MOET JY IN AG NEEM?
Maak seker Airbnb is volgens jou huidige munisipale soneringsregulasies by jou huis toelaatbaar.
As jy ’n deeltiteleiendom het, moet jy uitvind of die beheerliggaam jou sal toelaat om verblyf aan te bied.
Vind ook uit of jy by die munisipaliteit goedkeuring moet kry om oornagplek in jou huis op Airbnb aan te bied. Dit verskil van gebied tot gebied. Vra by jou munisipaliteit inligting oor hul regulasies.
Airbnb bied versekering aan gashere om hulle onder meer te beskerm teen skade wat ’n gas kan aanrig of eise wat ’n gas weens ’n besering kan instel.
Onthou ook jy sal jou bykomende huurinkomste aan die belastinggaarder moet verklaar.
UITGAWES
Sodra jou eerste Airbnb-gaste opdaag, sal jy ekstra uitgawes hê, soos ’n weeklikse skoonmaakdiens en verwelkomingsgeskenke wat jou goeie resensies op Airbnb sal help kry en maak dat die gewildheid van jou plek toeneem. Jy kan die skoonmaakdiens by jou fooi inreken.
Jy sal items soos koffie, seep en toiletpapier moet aanvul en gereeld wasgoed moet doen. As jy ’n afsonderlike wooneenheid verhuur, kan jy oorweeg om dit met ’n wasmasjien toe te rus. Onthou om gebruiksaanwysings daarvoor te gee en waspoeier te verskaf.
Elektriese toestelle soos ’n mikrogolfoond en tuimeldroër sal jou eenheid nog aanlokliker maak vir gaste, maar jou uitgawes moontlik opjaag.
Hoe beter jou eenheid toegerus is, hoe aanlokliker sal dit vir gaste wees.
MAAK JOU BLYPLEK SO AANLOKLIK
Bied jou gaste veilige parkeerplek, indien moontlik, veral vir oorsese gaste wat motors huur, sê Property Fox. Linne van goeie gehalte is wenslik. Bied Wi-Fi, wasgoeddienste, televisie en ’n video-op-aanvraag-diens, soos Showmax of Netflix. Koop ’n goeie koffiemasjien. Sorg vir goeie kommunikasie. Verwelkom jou gaste ’n dag voor hul aankoms met ’n e-pos. Gee goeie aanwysings na jou tuiste en probeer hulle self ontvang. Vertel hulle van alles wat ’n mens in die omgewing kan sien en doen. Hou kaarte van die omgewing byderhand waarop jy hulle kan wys watter uitstappies jy aanbeveel.
Gee hulle ’n lys met reëls oor hoe laat hulle hul kamer of eenheid moet ontruim, wanneer vullis uitgesit moet word en wanneer geraas taboe is. EKSTRA BRON: HUFFINGTONPOST.CO.ZA
‘Toeriste soek egte, betekenisvolle ervarings’