WIE IS JASON ROHDE?

Jason is in Engeland gebore, maar het op vierjarige ouderdom saam met sy ma, Brenda, na Suid-Afrika gekom.

Hy het aan die King Edward VII-skool in Johannesburg gematrikuleer en met sy B.Com.-studie in Midrand begin, maar dit in 1991 gestaak om by ’n versekeringsmaatskappy as klerk te werk.

Volgens Jason se hofverklaring is hy in 1993 met Susan getroud.

In Februarie 1994 het hy en Susan verhuis na Perth, Australië, waar Jason as ’n eiendomskonsultant gewerk het.

Twee jaar later was hulle terug in SuidAfrika en het Jason onder meer by ’n reisagentskap gewerk voor hy en sy ma saam ’n eiendomsagentskap gestig het. Dit is later deur Sotheby’s International Realty oorgekoop.

In 2010 is hy as die uitvoerende hoof van Lew Geffen Sotheby’s International Realty aangestel.

Die Rohde-gesin het in 2012 in hul spoghuis in Bryanston ingetrek.

Die huis is verlede jaar in Mei vir R10,3 miljoen in die mark gesit, maar die koopbedrag is later tot R9,8 miljoen verlaag.

Jason het kort nadat hy verlede jaar van Susan se moord aangekla is tydelik by sy suster, Tori Coughlan, en haar man in Morningstar, naby Melkbosstrand, gewoon.

Sy ma het toe na sy dogters omgesien. Sy oudste dogter studeer vanjaar en die minderjarige tweeling is op kosskool.

Tori het verlede jaar aan Huisgenoot gesê hul familie gaan deur “’n baie moeilike tyd”. Sy het gesê sy glo in haar broer se onskuld.

Eiendomsagente by Lew Geffen Sotheby’s is aangesê om nie met die media te praat nie.

Jason is intussen as uitvoerende hoof ontslaan.