IS DIT REGTIG JULLE, CHRISTIAN & AMY?

CHRISTIAN BALE en Amy Adams (albei 43) het ’n algehele gedaantewisseling ondergaan vir hul nuwe biografiese fliek, Backseat. Die akteurs was skaars herkenbaar toe hulle gewaar word op die rolprent se stel in Los Angeles.

Christian speel Amerika se gewese adjunkpresident Dick Cheney, wat onder oudpres. George W. Bush gedien het. Amy speel Dick se vrou, Lynne, ’n skrywer, akademikus en sakehoof uit eie reg.

Christian, wat gereeld tot uiterstes gaan vir fliekrolle, sê hy het danksy “baie pasteie” gewig aangesit om Dick te speel.

Verlede jaar het hy na bewering die rol as die beroemde motorvervaardiger Enzo Ferrari verbeur omdat hy nie betyds genoeg op ’n gesonde manier gewig kon aansit nie.

Backseat sal die politikus se opgang volg tot bes moontlik een van die invloedrykste adjunkpresidente in Amerika se geskiedenis. Cheney het ’n deurslaggewende rol gespeel in die ontwikkeling van die Bush-administrasie se beleid ná die terreuraanvalle op 11 September 2001, veral wat die oorloë in Afganistan en Irak betref. Van die ander sterre in die fliek is Steve Carell as die voormalige minister van verdediging Donald Rumsfeld, Sam Rockwell as Bush, en LisaGay Hamilton as Condoleezza Rice, voorheen die minister van buitelandse sake.