Nuut op die rakke
Ons braai en maak nostalgiekos, plant groente en leer die voëls in die tuin ken
HUISGENOOT BESTE RESEPTE – BRAAI
Huisgenoot het deur die jare al tallose braairesepte geplaas omdat dit so in lesers se kraal pas. “Nou het ons die bestes uitgesoek en dit in dié bielie van ’n braaiboek bymekaargesit,” skryf Carmen Niehaus, Huisgenoot se kosredakteur, in haar voorwoord.
Op ons vraag watter resepte haar gunstelinge is, mik sy eerste na die slaaibladsye. “Ek maak graag die gemarineerde sampioene en gemarineerde soetrissies. Dis gerieflik, want jy kan dit maak die dag voor jou gaste kom. En jy kan dit saamneem as julle gaan kampeer, want dit word gerieflik in glasflessies verpak.”
’ n Ander gunsteling is geelstert met knoffel-sojasous “omdat die sous so geurig is en keer dat die vis uitdroog”.
LANDBOU BOEREKOS
Dié uitgawe van Landbouweekblad se gewilde boerekostydskrif gaan oor erfeniskos. Maar moenie ’n kultuur-historiese aanslag verwag nie. Dit is daardie soort resepte wat mense deur die dekades met die hand neergeskryf het nadat hulle iets lekkers by iemand geëet het. Dis dus reeds deur verskeie generasies of vriende getoets en verhef tot “die lekkerste”.
Die kosredakteur, Arina du Plessis, het meer as 100 resepte hier byeengebring, van bykos, souse en smere tot groente en vis. Die meeste aandag word gegee aan Suid-Afrikaners se groot liefdes: soetgoed en vleis.
Arina skryf: “Vir rys en aartappels is altyd plek op ’n plaastafel en, ja, ook vir ’n paar soet groentes. Maar ons skep graag eerste ’n stukkie vleis op ons bord. Of ons nou buite braai of kook vir bibberweer, uithang of ’n randrekker moet bedink vir daardie lang maande – ’n vleisgereg bly ons voorkeurkos.”
Dan volg ’n hoofstuk met die rykste versameling vleisresepte wat jy jou kan verbeel. Die gebraaide varklies met appelsider en speserye het ek eerste gemaak en ek kan getuig dit maak ’n Sondagmaaltyd soos min.
“En van die Oosterse plathoender hou ek net so baie; nuwe geure vir hoender oor die kole.”
Hier is 124 resepte vir bees, lam, vark, hoender, vis, seekos, potjies, kos op ’n stok, groente, slaai, brood en nagereg, alles oor die kole. As bonus deel 14 bekendes, onder andere Melinda Bam, Theuns Jordaan en Loyiso Bala, hul wenke. WEN
Vyf lesers kan ’n eksemplaar van Braai (R48 by supermarkte) wen. SMS jou antwoord, naam en adres voor 16 November om 17:00 na 35407. Vraag: Wat is die Huisgenoot-kosredakteur se naam? (As jy Braai of Boerekos nie in die hande kry nie, bel Johan by 021-406-4962.)
Ek is boonop bly om ou gunstelinge soos botterskorsie met maalvleis-en-kaasvulsel en koolfrikkadelle waarvoor ek nog nooit resepte gehad het nie hier te sien.
Wat die oog vang onder die soetgoed, is goue oues wat ’ n nuwe aanslag kry soos Hertzoggie- laagkoek en melktertroomys.
Daar is onderhoude met ’ n paar voorslagkokke wie se resepte die soort is wat ’n mens jare lank al wens jy het, soos Lucille Liebenberg se anysbeskuit, Annatjie van der Merwe se vrugtekoek, Annatjie Wessels se vlakoek en Jay Oelofse se kerriesosaties.
Dié tydskrif sal ook goed pas in die Kerskous van jonger mense (veral dié wat oorsee woon) wat verlang na eetgoed uit hul kleintyd. WEN
Vyf lesers kan elk ’n eksemplaar van Boerekos (R47 by groot supermarkte landwyd) wen. SMS jou antwoord, naam en adres voor 16 November om 17:00 na 35407. Vraag: Wat is die Landbouweekblad-kosredakteur se voornaam?