DIE DIE MENSE AGTER DIE KARAKTERSMENSE AGTER DIE KARAKTERS
DIE HIP-HOP-ONNIE B-Boy Ace
CONWAY OCTOBER (22) sien baie van homself in Ashwin se karakter. Hulle doen hul bes om nie dieselfde foute te maak nie. Al staan hy bekend as B-Boy Ace, is dit juis briekdans wat hy die moeilikste vind. Hip-hop is een van sy gunstelingdanse. Hy sê sy karakter is ’n omgeemens, en dis iets waarna hy ook elke dag streef. Kitsfeit Hy het in die fliek Honey 3: Dare to Dance, waarin die Amerikaanse sangeres Cassie die hoofrol vertolk het, gespeel en in die televisiereeks Sara Se Geheim.
DIE WEGLOOPKIND Ashwin Bruinders
Hy word gespeel deur DILLON WINDVOGEL, op 17 die jongste in die groep. Dillon is vanjaar ’n matrikulant aan die Hoërskool Belhar. Hy en Austin Rose, wat Wafiq Cassim speel, het ’n baie hegte band. Hulle het al in vorige toneelstukke saam gespeel. Kontemporêre dans is een van sy gunstelingdansvorms. Iets wat hom altyd sal bybly van die reeks, is die lekker lag tussen tonele. Kitsfeit Benewens sy liefde vir dans het hy onlangs begin leer om klavier te speel. Karate is ook een van sy buitemuurse aktiwiteite.
DIE HART-EN-SIEL-MEISIE Zoliswa ‘Zoli’ Ntini
KETRICE MAITISA (23) is gek oor musiek. Haar gunstelingliedjie is No Fear deur DeJ Loaf. Hip-hop, broadway, jazz en kontemporêr is haar gunstelingdanse. Sy bewonder haar karakter, Zoli. “Sy is dapperder as ek wat opstaan teen boelies betref.” Kitsfeit Sy het in die fliek The Seven of Daran: The Battle of Pareo Rock gespeel, in ’n Portugese kortfliek verskyn en ’n rol gehad in ’n Duitse fliek, Mein Traum von Afrika (2005). Sy is ook ’n aanbieder en was ’n finalis in die Shield Teens No Sweat Music Fan Presenter Search.
DIE BELOWENDE DANSERES Christa du Toit
KAYLA VAN TONDER (21) maak haar debuut as aktrise in danZ! Sy sê die danse saam met die karakter Titus was ’n uitdaging. Anders as haar karakter, Christa, het Kayla respek vir haar ouers en grootmense. Sy het net goeie dinge te sê oor die danZ!-span en glo spanwerk is belangrik. Kitsfeit Misty Copeland, hoofdanser van die Amerikaanse Balletteater, is haar rolmodel. “Ek bewonder die feit dat sy in ’n laat stadium begin dans, maar steeds haar drome bereik het.”
SY NAAM = 'SUKSESVOL' Wafiq Cassim
AUSTIN ROSE (20) is ’n gesoute akteur wat al in die rolprente Noem My Skollie, Four Corners en die internasionale televisiereeks Of Kings and Prophets gespeel het. Dié ou kan dans, sing, toneelspeel en modelwerk doen. Boonop skryf hy selfs gedigte en kortstories. “Ek het besef ek moet myself nie beperk tot een ding in dié bedryf nie.” Kitsfeit Austin het al met groot name in die bedryf saamgewerk, soos Emo Adams, Shaleen Surtie-Richards, Jimmy Nevis en DJ Mouton.
DIE REEKSFEEKS Angel Abrahams
MIKHAILA MATHYS (25) is van kleins af in hip-hopdans opgelei, maar sê Latyns-Amerikaanse danse is vir haar ’n uitdaging omdat sy nie gewoond is aan salsa, cha-cha, samba en rumba nie. “My persoonlikheid is medelydend, liefdevol en vriendelik.” Benewens toneelspeel en dans geniet sy dit om te bak, sing, verf en verskillende musiekinstrumente te bespeel. Kitsfeit Sy het al in Britse en Amerikaanse televisiereekse en teaterproduksies opgetree, in televisie advertensies gesig gewys en modelwerk gedoen.
DIE WINTIE Titus Junior Tesselaar
JULIAN HURLEY (24) maak sy akteursdebuut in danZ! Kontemporêre en Latynse danse is sy gunstelinge, juis omdat dit by sy karakter pas. Julian sê hip-hop is vir hom nog ’n uitdaging, maar hy sal dit beslis ook baasraak. En hy voeg by dat hy en Titus glad nie dieselfde is nie; hy het baie meer empatie vir minderbevoorregtes. Kitsfeit Julian skryf graag sy eie liedjies in sy vrye tyd.
EIENAAR VAN DIE DANSSKOOL Zain Hendricks
RUBEN ENGEL (34) sê wat musiek betref, geniet hy disko en funk. En dans? Die tango! Hy sê die wals voel vreemd om te dans, en hoewel hy en sy karakter ’n paar dinge gemeen het, het hy meer gedissiplineerd grootgeword. Kitsfeit Hy doen al van 16 modelwerk en was die naaswenner in die Mnr. SA-kompetisie in 2009. Hy praat vlot Duits.