WAT IS DIE OORSAKE?
Biologiese, sielkundige en sosiale faktore kan ’n rol speel by vakansiedepressie, sê Ester. ’n Ongesonde leefstyl, ystertekort of ongekontroleerde metaboliese steurings, soos insulienweerstandigheid en hoë bloeddruk, maak ’n mens meer vatbaar vir vakansiedepressie.
Sielkundige faktore soos disfunksionele denkpatrone en onverwerkte gebeure kan ook in die rustige vakansietyd na vore kom. Jy word dan met al die gevoelens gekonfronteer wat jy deur die jaar kon vermy toe jou werk en take tuis jou besig gehou het.
Ester meen sosiale faktore is een van die grootste oorsake van vakansiedepressie, want in dié tyd raak mense meer bewus van die leemtes in hul lewe.
“Mense wat nie deur die jaar moeite gedoen het met hul huwelik, familieverhoudings of vriendskappe nie, kan in die feestyd besef hulle is baie eensaam.
“Vir baie mense is dit die eerste Kersfees en Nuwejaar sonder ’n geliefde wat sedert die vorige feestyd gesterf het. Dié tyd kan vir geskeides ook baie moeilik wees, veral wanneer hul kinders die vakansie elders by die ander ouer deurbring.”
Die Kerstyd kan vir party mense pynlike herinnerings laat opwel. “Mense wat arm grootgeword het, word herinner aan die pyn toe hulle gehoor het van maats wat groot geskenke gekry het en hulle die teleurstelling moes ervaar van geen geskenk nie.”
Die vakansie- en feestyd kan ’n eensame tyd wees, beaam Esther.
“Party mense het bloot nie ’n liefdevolle familie nie en kan dan baie alleen voel,” sê sy. “By hul werk of skool het hulle deur die jaar ’n kans om met ander mense om te gaan, maar die vakansietyd kan dan geweldig eensaam en