Angelina Jolie blom op haar eie
Terwyl vele gerugte oor hulle blyk onwaar te wees, lyk dit of Angelina beter as alleenloper vaar as Brad
TOT in die doodsnikke van 2017 het hulle die tonge laat klap soos net Brangelina dit kan regkry. Eers was daar gerugte dat Brad Pitt sy vervreemde vrou, Angelina Jolie, ’n skikkingsbedrag van R1,3 biljoen aangebied het omdat sy glo hul huwelik nog ’n kans wou gee, maar hy nie meer belanggestel het nie. Brad reken as hy Angie genoeg geld aanbied, sal die stof eindelik gaan lê, het sommige skindertonge bespiegel. Toe slaan ’n gerug oor ’n “Kersfeeswonderwerk” uit. Brad en Angelina het glo hul verskille opsygeskuif en gaan albei die feestyd saam met hul kinders deurbring. En die kersie op die koek? Hulle is weer ’n paartjie . . . “Die feestyd maak Brad sentimenteel oor familie, en veral oor sy kinders,” het Hollywood Life, ’n nuuswebtuiste oor glansmense, berig. “Hy geniet dit om hulle te bederf en Angie meng nie daarmee in nie.” Steek daar waarheid in al dié stories? Ongelukkig blykbaar nie. Gossip Cop, ’n webtuiste wat daarop aanspraak maak dat dit die koring van die kaf skei, beweer die skikkingstorie is twak, nes die gerug dat Brad, Angie en hul kroos Kersfees saam sou deurbring. Intussen lyk dit of die egskeiding van die dekade steeds sloer terwyl die glanspaartjie van die eeu sake probeer uitpluis. Ter wille van hul kinders – Maddox (16), Pax (14), Zahara (12), Shiloh (11) en die negejarige tweeling Knox en Vivienne – probeer hulle glo op goeie voet uitmekaargaan. Maar versoen raak? Vir hul aanhangers, wat bly hoop op ’n gelukkige einde vir die Brangelina-sprokie, blyk die storie oor ’n moontike hereniging te goed te wees om waar te wees.
SEDERT hulle in September 2016 uitmekaar is, lyk dit of Angelina (42) die lewe as alleenloper beter baasraak as Brad (54). Hy verdryf glo die tyd deur kleibeelde te maak “terwyl hy na Frank Ocean se musiek luister en matcha-groentee drink”, berig Melanie Bromley van E! News.
Intussen vaar aarAngie Angie heel goed op haar eie. Sy het 2017 op ’n hoë noot afgesluit toe First They Killed My Father benoem is vir ’n Golden Globe-prys vir die beste buitelandse fliek. Die rolprent, onder haar regie, is geskiet in Kambodja, Maddox se geboorteland, en hy het ook hand bygesit met die maak daarvan.
Al het sy haar hande vol as enkelma, gaan Angelina voort met humanitêre projekte. Sy span met die Noord-Atlantiese Verdragsorganisasie (Navo) saam om die lot te verbeter van vroue in oorloggeteisterde gebiede.
In ’n artikel wat sy saam met Jens Stoltenberg, sekretaris-generaal van Navo, vir die Britse koerant The Guardian geskryf het, sit sy uiteen hoe dié organisasie ’n einde kan help maak aan geweld op grond van geslag.
“Al word dit deur die internasionale reg verbied, word seksuele geweld steeds in verskeie konfliksituasies as oorlogstaktiek ingespan – van Mianmar tot Oekraïne en van Sirië tot Somalië,” skryf sy. “Daaronder tel massaverkragtings, seksslawerny, etniese suiwering en terreur. Dit verklaar grotendeels waarom dit dikwels gevaarliker is om ’n vrou in ’n oorlogsgebied te wees as ’n soldaat.”
In die lewe ná Brad bly sy druk besig, reis saam met haar kinders die wêreld vol en lyk soos altyd koel en kalm. Af en toe laat Angelina wel deurskemer dis nie altyd maklik nie, soos toe sy gesê het: “Ons sal altyd ’n gesin wees.”
Sy het gehoop By the Sea, die 2015-fliek wat sy en Brad saam gemaak het, sou hul huwelikslewe verbeter, het sy onlangs aan The Hollywood Reporter gesê. “Ons het mekaar ontmoet terwyl ons saamgewerk het en ons het goed saamgewerk,” het sy gesê met verwysing na Mr. & Mrs. Smith. Hul romanse het tydens die verfilming van dié 2005-rolprent vlam gevat. “Ek wou hê ons moes saam ernstige werk aanpak. Ek het gedink dit sou vir ons ’n goeie manier wees om te kommunikeer. Maar daar was iets swaars aan daardie situasie wat voortgeduur het.”
Daarna het sy gepraat oor alles waarmee sy al in haar lewe moes worstel: die dood van haar ma, Marcheline Bertrand, in 2007 weens kanker van die eierstokke, haar eie voorkomende mastektomie in 2013, die verwydering van haar eierstokke om kanker te verhoed – en oor hoe sy gehoop het ’n “kunswerk” kon die seerkry genees. Maar toe misluk By the Sea by die loket en haar en Brad se huwelik beland op die rotse.
Tog sê Angelina sy is vandag bly hulle het die fliek saam gemaak. “Ons het iets saam verken, wat dit ook al was. Dit het dalk nie sekere dinge opgelos nie, maar ons het wel iets gekommunikeer wat tussen ons gesê moes word.”
Haar oomblikke van openhartigheid is egter niks vergeleke met Brad s’n nie. Hy dra omtrent sy hart op sy mou. “Ek staan elke oggend op en maak ’n vuur. Wanneer ek gaan slaap, maak ek ’n vuur, net omdat dit my laat voel daar’s lewe,” het hy aan die tydskrif GQ gesê.
Hy het ook al sy foute as huwelikmaat erken: Hy het te veel gedrink, Angie te min ondersteun en sy eie pa se patriargale ouerskapstyl te veel nagevolg.
Brad se selfwroeging het die harte vir hom laat bloei, en Angelina moes dit ontgeld. Sy is uit voeling met ander enkelma’s, sy moet die skuld vir die skeiding dra en sy is nie wat sy voorgee om te wees nie, was ’n paar van die aantygings.
Een ding wat sy nie voorgee om te wees nie is ’n doodgewone ma. Anders as die modeontwerper Victoria Beckham deel sy nie aanlyn foto’s van haarself en die kinders en honde nie. Sy probeer ook nie die beeld van ’n sukkelende enkelma skep om steun te wen nie. Maar vir Brangelina se aanhangers bly dit ’n jammerte dat sy Brad nie in haar lewe wil terugverwelkom nie.