MANSON: VRY OM TE MOOR
In die eerste paar jaar ná sy vrylating vestig Charles Manson hom as ghoeroe in San Francisco se hippiebuurt Haight-Ashbury. Hy lok ’n gevolg van ’n paar dosyn mense, meestal vroue, wat as die “Manson-familie” bekendstaan en hom soos ’n Jesusfiguur behandel. Vanaf ’n afgeleë plaas in SuidKalifornië beplan hy die moorde wat Amerikaners sou skok in ’n poging om ’n rasseoorlog te ontketen. Hy glo dit word in die Beatles se liedjie Helter Skelter voorspel.
Op 9 Augustus 1969 stuur hy sy volgelinge Tex Watson, Susan Atkins, Linda Kasabian en Patricia Krenwinkel na die platevervaardiger Terry Melcher se vorige huurhuis met die opdrag om almal daar dood te maak. Hulle skiet en steek vyf mense dood, onder wie Sharon Tate, die vrou van die rolprentregisseur Roman Polanski. Hulle was die huis se nuwe huurders en Sharon was agt en ’n half maande swanger.
Die volgende aand vergesel Manson dié vier asook Leslie van Houten en Steve Grogan na die huis van die kruidenier Leno LaBianca en sy vrou, Rosemary, in Los Angeles. Hulle vermoor die egpaar en skryf die woorde “Death to pigs” met bloed teen die mure.
Tydens die hofsaak hou Manson hom as ’n demoniese mag voor en kerf ’n swastika op sy voorkop uit. Hy word eers ter dood veroordeel, maar die vonnis word later tot lewenslange tronkstraf versag. Die owerheid van die Kaliforniese staatsgevangenis waar Manson sedert 1971 aangehou is, het onlangs aangekondig hul berugste inwoner is op 83 jaar weens natuurlike oorsake oorlede.