STEEDS GEWILD
GEFERMENTEERDE KOSSE
Die gewildheid van gefermenteerde kosse neem toe. Kimchi (’n Koreaanse bykos van gesoute en gefermenteerde groente), miso (’n pasta van gefermenteerde sojabone saam met sout en koji en soms rys, gort of ander bestanddele) en piekels (gemaak sonder suiker) gee jou energievlak ’n hupstoot, maar help veral om jou spysverteringstelsel skoon en gesond te hou, en is boonop propvol geur. Ál meer restaurante en gesonde kitskos restaurante sluit dit nou by hul spyskaart in.
ONTBYT ENIGE TYD
Verlede jaar het die klem geval op die “brinner”neiging, waar ontbyt en aandete gekombineer is. Vanjaar is die neiging nog sterker en het dit uitgebrei na ontbyt-enige-tyd-van-die-dag. Verby is die dae van net spek en eiers soggens eet! Veral omdat bees- en lamsvleis nou so duur is, word eiers, varkvleis en hoender beskou as die voor die hand liggende proteïen aanvulling vir enige maaltyd.
Baie restaurante het dwarsdeur die dag iets met ’n ontbyttema op hul spyskaart, soos die gereg sjaksouka, eiers geposjeer in tamatie, uie en rissies.
DEELKOS
Restaurante bied deesdae ’n groter verskeidenheid tapas (happies) op hul spyskaart aan. Hierdie Spaanse deelkos loop hand aan hand met die nuwe geslag se behoefte aan avontuurlustigheid en opwinding. ’n Geselligheid in ’n restaurant word nou aangevul deur ’n verskeidenheid tapas per tafel te bestel, en dan eet almal rondom die tafel bietjie-bietjie van elke gereg.