LAMSFRIKKADEL-EN-QUINOA-SLAAI
GENOEG VIR 4 MENSE Bereiding en gaarmaak: 40 min. Verkoel: 30 min. Bak: 1 uur Ek noem quinoa “die heilige graantjie”. Die Inkas het daarna verwys as “die moeder van alle grane”. Maar dis net halfpad reg; quinoa is ’n skyngraan en heeltemal glutenvry. Dis sag op die maag en vol vesel en minerale. GEURSOUT 15 ml (1 e) komynsaad 15 ml (1 e) wit
sesamsaad 15 ml (1 e) soutvlokkies GROENTE 2 uie, in kwarte gesny 30 ml (2 e) olie vir sprinkel, plus ekstra vir bo-oor verf 1-2 murgpampoentjies, in die lengte langs in baie dun repe gesny FRIKKADELLE 1 murgpampoentjie,
gerasper 1 ui, gerasper 500 g lamsmaalvleis 100 g haloumikaas,
gerasper 45 ml (3 e) gekapte
vars kruisement 30 ml (2 e) ongegeurde
volroomjogurt sout en swartpeper 45 ml (3 e) olie vir
braai QUINOA 250 ml (1 k) quinoa 15 ml (1 e) olie vir braai 2 vet knoffeltoontjies,
gekneus en fyngekap 300 ml hoender
aftreksel sout en swartpeper 30 ml (2 e) gekapte
vars kruisement 7,5 ml (½ e) rooiwyn
asyn
Voorverhit die oond tot 200 ºC. Smeer ’n oondpan (waarin die uie knus sal pas) met botter.
1 Geursout Verhit ’n pan oor matige tot hoë hitte. Rooster die komyn- en sesamsaad 1-2 min. Skep uit in ’n bakkie en meng met die soutvlokkies. Hou eenkant.
2 Groente Plaas die uie in die oondpan en sprinkel die olie oor. Rooster sowat 1 uur in die oond.
3 Verf die murgpampoentjies met ’n bietjie olie en braai op ’n riffelpan oor matige hitte tot jy roosterstrepe aan albei kante het. Hou eenkant.
4 Frikkadelle Plaas al die bestanddele vir die frikkadelle (behalwe die olie) in ’n groot mengbak. Gebruik jou hande om alles goed te meng. Vorm frikkadelle so groot soos okkerneute. Plaas die frikkadelle vir 30 min. in die yskas.
5 Verhit genoeg olie in ’n groot swaarboompan en braai die frikkadelle tot mooi bruin en gaar.
6 Quinoa Spoel die quinoa af en dreineer. Verhit die olie in ’n swaarboomkastrol, braai die knoffel 1-2 min. en voeg die quinoa by. Roerbraai 1-2 min.
7 Voeg die aftreksel by. Geur met die sout en peper, verlaag die hitte en sit die deksel op. Laat 20 min. prut tot die vloeistof weggekook het.
8 Skep die quinoa in ’n bak en roer die kruisement en asyn deur.
9 Voeg die uie en murgpampoentjies by die quinoa en meng. Rangskik die frikkadelle bo-op. Strooi die geursout oor en plaas die res in ’n bakkie. Sit voor saam met slaai en saadbrood.