Mev Zuma no 4 koer oor manlief
Drie van No. 1 se vroue hou hulle besig met, wel, gewone dinge. Maar sy No. 4 koer op Instagram oor manlief en deel raad uit oor die liefde
SY IS Vrou Nommer Vier en word beskou as die glinsterende, spontane juweel in die president se groot Zuma- huishouding. Thobeka MadibaZuma is loslip oor haar lewe saam met Jacob Zuma, sy ander vroue en hul gesamentlike kroos in Nxamalala, die privaat presidentswoning in die Nkandla-voorheuwels. Ja, die een waarvoor belastingbetalers te veel opdok.
Madiba-Zuma, wat haar emosies in die sosiale media met hutswoorde uitdruk, gryp elke kans aan om te wys hoe na sy is aan die president met wie sy in 2010 getrou het. Sy en JZ het drie kinders saam. Sy het 90 000 volgelinge op Instagram onder haar profiel, firstladyzuma. (Vrou Nommer Drie, “dr. Bongi NgemaZuma”, het net 4 853 en deel selde gelukkige gesinskiekies.)
Op die ANC-konferensie in Desember in Nasrec, Johannesburg, is Zuma erg gekarnuffel, maar kyk ’n mens na Vrou Nommer Vier se foto’s van hom en haar by Casa Nkandla was hy sorgeloos in kleurryke Madiba-hemde. Basta met politieke grafskrifskrywers . . .
In Nkandla se sosialemediaborrel praat niemand oor die Guptas, geregtelike ondersoekkommissies of ’n presidensiële herroeping nie. Die president, omring deur sy glimlaggende kinders, lyk in beheer. En kyk, daar sit hy in die skadu, afgesonder deur glimmende polisiesperstroke, terwyl tradisionele Zoeloe-dansers hom op Nuwejaarsdag vereer.
Madiba-Zuma het op Oujaarsaand op haar Instagram geskryf: “2018 is amper hier, wat beteken daar is nuwe geleenthede, hoop, drome en voornemens. Terwyl ons die nuwe jaar binnestap met nuwe geesdrif, is dit ook ’n tyd om te besin oor 2017 en die mooi oomblikke wat ons met familie en vriende gedeel het.
“Ek dink aan dié wat my en my gesin deur die moeilike tye gesteun het. Die gees van Nuwejaar is nie net herinnerings nie, maar ook vir uitsien na die toekoms en die belofte van liefde, onvoorwaardelike steun en hope geluk. Vergewe die mense wat jou dalk seergemaak het, laat gaan party mense en begin 2018 op ’n helder en vars noot. Daar moet geen plek vir haat in die nuwe jaar wees nie. Gelukkige 2018 en Baie Liefde #newyear #2018 #love #laugh #live”.
Op 4 Januarie het Madiba-Zuma foto’s gedeel van waar sy en JZ op hul huweliksherdenking soos smoorverliefde tieners na mekaar staar – maar ook ’n ander kant van hul verhouding verklap.
“Tot die einde van tyd en ons einde sal ek jou liefhê. Liefde is om ’n onvolmaakte mens volmaak te sien. Vroue, mans, trek die kleed van die hofregter uit. Trek eerder die kleed van ’n skilder aan wat die skoonheid van die liefde vasvang.
“Maar soms is ons motiewe nie suiwer nie. Ons wil ons geliefdes verander omdat ons skaam is oor wat ander oor ons kinders, ons sibbes, eggenote en ouers sê. Iemand het vir my gesê die huwelik is soos om na ’n restaurant te gaan.
“Nadat jy jou gereg bestel het, verneem jy wat die ander aan tafel bestel het en skielik is jy spyt oor wat jy bestel het.
“Glo my, die begeerte om te vergelyk veroorsaak so baie ellende en lei tot eg-