Intieme troue vir Bok Rudy Paige
Die Springbok-rugbyspeler Rudy Paige en sy Ronelle het op ’n intieme, vreugdevolle seremonie afgehaak
NRUGBYWEDSTRYD is een ding, maar ’n troudag iets anders. Vra vir Rudy Paige. “Dit is nie soos ’n rugbywedstryd waarop jy jou kan voorberei en weet wat kom nie,” sê die Springbokke en Blou Bulle se skrumskakel. Dis dié dat die senuwees veel erger as voor ’n toetswedstryd knaag die oggend voor sy troue met sy meisie van die afgelope vier jaar, Ronelle Kolkota (30).
Maar toe sy donkerkopbruid hom op Saterdag 13 Januarie om halfvier aan haar pa, David, se sy tegemoet stap, kan Rudy (28) nie sy oë van haar afhou nie. Alles in die kapel op die Eureka-wynlandgoed in Durbanville by Kaapstad is skitterwit, afgesien van ’n spatsel groen in ’n welige blommerangskikking voor ’n tafel met brandende kerse.
Dit is ’n romantiese prentjie, maar tog eenvoudig en minimalisties, soos die bruidspaar daarvan hou. Hul eerste ete-afspraak was immers in ’n kitskoseetplek. En Rudy het haar sommer in die kombuis van hul huis in Pretoria die jawoord gevra.
Tog is hulle vandag ’n glansryke bruidspaar; sy in ’n klassieke trourok van die Bridal Manor-boetiek in Pretoria en hy uitgevat in ’n swart broek en wit baadjie.
Rudy se pa, Johannes, ’n pastoor, be- hartig die plegtigheid. Toe hy verklaar hulle is nou man en vrou, omhels die bruidegom sy bruid en soen haar passievol, tot groot vermaak van hul gaste.
Onder hulle is talle bekende gesigte, soos die rugbyspelers Siya Kolisi, Eben Etzebeth, Jesse Kriel en Handré Pollard, en die voormalige 7de Laan-ster Christo Davids, ’n vriend uit Rudy se kinderjare.
Hand aan hand stap hulle uit die kapel terwyl roosblare op hulle neerreën en die
H United Brass Band, ’n klopsegroep van Hanover Park op die Kaapse Vlakte, van die paartjie se gunstelingliedjies speel.
Ronelle kan nie haar vreugde beteuel nie. Sy lig haar roksoom op en begin net daar dans.
En hoekom nie? Sy het immers pas met haar beste vriend getrou. UL paadjies het in 2009 gekruis toe Ronelle ’n eerstejaar-argitektuurstudent aan die Universiteit van Johannesburg was en Rudy vir die universiteit se o.19span rugby gespeel het.
Hulle was jare lank “net vriende” tot die liefde in 2014 begin blom het.
“Hy’s jonger as ek en ek het gedink hy sou nie belangstel nie,” vertel Ronelle. Toe besluit sy dis tyd om te wys sy stel in meer as vriendskap belang. Sy het vir hom ’n teksboodskap gestuur net om “hallo” te sê. Sy antwoord: “Wil jy middagete kry?”
Sy het toe al as bestuurder by die logistieke maatskappy in Johannesburg gewerk waar sy steeds werk, en Rudy het vir die Blou Bulle in Pretoria uitgedraf.
“Ek het reguit van die werk gekom en hy was in sy blou oefenklere en het my na McDonald’s in Johannesburg geneem,” onthou sy.
Sedertdien is hulle onafskeidbaar.
Rudy, oorspronklik van Heidelberg in n die Wes-Kaap, en Ronelle, van Eerste- rivier in Kaapstad, het verlede jaar in n Pretoria nesgeskop. Daar het hy die dag voor haar 30ste verjaardag verlede Maart die jawoord gevra – terwyl sy besig was om koffie te maak.
“Die ringboksie het nie in sy sak gepas nie en hy was bekommerd dat hy dit sou verloor,” vertel Ronelle. “Hy het op een knie afgesak terwyl ek in die kombuis gestaan het.”
Hy wou haar daarna uitneem en haar behoorlik bederf, maar Ronelle was doodgelukkig om tuis te bly. “Ek was so opgewonde dat ek nêrens heen wou gaan nie.”
Hy was erg op sy senuwees toe hy die groot vraag vra, erken Rudy; en op hul troudag is dit dieselfde storie. Hy was “glad nie betrokke” by die beplanning vir hul troue nie, vertel Ronelle met ’n laggie. “Hy het gesê hy het my gevra om te trou; daarom is sy werk nou afgehandel.”
Hy het darem die liedjie vir hul eerste dans as man en vrou gekies: Ed Sheeran se liefdesballade Perfect.
Haar platinumtrouring is in die vorm van ’n protea en Ronelle is mal daaroor, sê Rudy. “Dit is ’n eenvoudige ring. Ons is ’n eenvoudige paartjie en die ring beskryf ons twee goed.”
Eenvoud is ook ’n goeie beskrywing vir hul huweliksonthaal. Die dekor is stem- mig en landelik met ’n klassieke kinkel.
Christo hou vandag sy lyf seremoniemeester. Toe hy aan die woord kom, vra hy Ronelle moet haar linkerhand op die tafel sit en Rudy sy regterhand bo-op hare.
“Kyk mooi, Rudy, dis die laaste keer dat jy die oorhand in jul verhouding het,” laat Christo hoor terwyl die gaste uitbars van die lag.
In sy toespraak sê Ronelle se pa hy was die vernaamste man in sy dogter se lewe tot sy Rudy ontmoet het. “My vrou, Jacky, het nooit saam met my rugby gekyk tot Rudy in die prentjie gekom het nie. Nou is sy ’n kenner,” skerts hy.
Rudy se ma, Joany, het wyse raad vir die paartjie. j Sy y sê sy y weet haar seun kan m moeilik wees, en sy het gehoop hy so sou iemand vind wat hom verstaan en weet hoe om hom te hanteer. “W “Wees lief vir mekaar,” sluit sy af. Ná die toesprake lê die gaste weg aa aan ’n carpaccio-voorgereg, sappige la lamskenkel as hoofgereg en ’n ryk cr crème brûlée vir nagereg. Toe hulle die drielaagtroukoek sn sny, speel die Frank Sinatra-liedjie Lo Love and Marriage op die agtergro grond. ““Ons kon nie op een geur vir die koe koek besluit nie,” sê Ronelle. “Toe laat ma maak ons een laag sjokolade, een tiramisu en een rooifluweel.” Hul wittebrood sal vir eers moet wag. “Ek het ’n liesoperasie ’n paar dae voor die troue gehad en dit kan tot agt weke duur om te herstel,” verduidelik Rudy. “My vrou verstaan. Ons sal tydens Superrugby, wanneer my span ’n week afkry, met vakansie gaan na ’n plek waar ons net mekaar se geselskap kan geniet, iewers sonder selfoonontvangs.”
DIE EGPAAR BEDANK: BRUIDEGOM EN STROOIJONKERS SE PAKKE: JOHAN’S CLOTHING (JOHAN VAN LOUW); TROUROK: BRIDAL MANOR, BRIDALMANOR.CO.ZA; GRIMERING: JAYDÉ MOUTON ARTISTRY; HARE: MELDA NIEUWENHUIZEN VAN BRUSH SALON, TYGER WATERFRONT, BELLVILLE, 021-914-1179; TROUBEPLANNING: EVENTWORX, KAAPSTAD, EVENTWORX.CAPETOWN; TROULOKAAL: EUREKA-LANDGOED, EUREKAFUNCTIONS. CO.ZA; KOEK: KANYA HUNT, KANYAHUNT.CO.ZA; FOTO’S: DANIELLE OLIVER PHOTOGRAPHY; VIDEO: AGAPE STUDIO, AGAPE-STUDIO. ORG; DJ: EPIC SOUND MOBILE DISCO (CARL KENNEDY); WYN: GABRIËLSKLOOF WINES, ERIKA OBERMEYER WINES; BOETIEKBIER: TOAST ALE, STRIPED HORSE; VERVOER: WIGGLE LUXURY CAR HIRE, WIGGLECARHIRE.CO.ZA