DÍT HELP MET STIEFKINDERS

Vir kinders wat ’n traumatiese egskeiding of die dood van ’n ouer moet verwerk, kan dit moeilik wees om ’n nuwe ouer te aanvaar, sê Gerrie Pretorius, ’n berader van Life Counsel in Pretoria. “Kinders het soms hulp nodig om eers deur hul eie seer te werk voor hulle gereed is om iemand anders in hul wêreld te aanvaar,” verduidelik hy.

Ouers moet in gedagte hou dat kinders nie altyd die nodige vaardighede het om hierdie soort veranderings te hanteer nie, sê Retha Kruger, ’n opvoedkundige sielkundige van Kaapstad; daarom moet die kind die nodige steun kry en die situasie so sensitief moontlik hanteer word. Hier is Gerrie en Retha se raad: Verduidelik vir die kinders die stiefouer is nie daar om hul biologiese ouer te vervang nie, maar wel omdat die stiefouer hul ma of pa liefhet en ’n nuwe verhouding met almal in die huis wil opbou.

Aanvanklik is dit die beste dat die biologiese ouer die dissipline in die gesin handhaaf tot die stiefouer ’n sterker band met die kinders smee.

Wees konsekwent oor hoe dissipline toegepas word en versigtig dat die kinders nie jou en jou maat teen mekaar afspeel of emosioneel manipuleer nie.

Moenie betrokke raak by konflik tussen die kind en die biologiese ouer nie – gee hulle ruimte om dit self op te los.

Moenie respek by jou stiefkinders probeer afdwing nie; moedig dit eerder met liefde en goedhartigheid aan.

Moenie voor die kinders sleg praat van hul biologiese ouers nie, veral nie jou maat se eks nie. Bly neutraal.

Praat openhartig met jou maat oor uitdagings en frustrasies en probeer saam oplossings vind.

Doen moeite vir gehaltetyd saam en om nuwe tradisies en rituele te vestig. As ’n probleem opduik, praat dadelik daaroor.

Moenie huiwer om professionele hulp te kry as jy voel jy kom nie die mas op nie. Gesinsberading kan dinge in perspektief help stel.