Noord-Korea se nuwe geheime wapen
Op die Winterspele span NoordKorea se Kim Jong-un beeldskone vroue in, glo om die aandag van sy streke af te lei
DIE wêreld gons dikwels oor die Noord-Koreaanse leier, Kim Jong-un, se alewige dreigemente om kernmissiele af te vuur, maar nou lyk dit of die koddige diktator ook wapens van ’n heel ander aard in sy arsenaal het . . . Toe 229 beeldskone jong vroue, uitgetof in eenderse rooi sweetpakke en met wit-en-blou verenigde Koreaanse vlaggies in die hand, met militêre presisie in pylreguit rye die eerste keer hul sitplekke op ’n paviljoen op die Olimpiese Winterspele in Suid-Korea inneem, het die kameras en selfone dadelik begin kliek.
Dit was by die vroueyshokkiewedstryd tussen Korea en Switserland, waar spelers van Noord- en Suid-Korea die eerste keer in die geskiedenis van die Spele saam in een span deelgeneem het. Alle oë was op die rasieleiers toe hulle volksliedjies begin sing om hul landgenote aan te moedig. Hul handbewegings en danspassies was so perfek gesinchroniseer dat dit byna onmoontlik was om te glo dis regtig doodgewone mense wat so foutloos dieselfde bewegings maak.
Maar dinge is nie noodwendig so maklik en mooi soos dit lyk nie, want omstanders het gou besef die vroue maak geen oogkontak nie – nie met ’n kameralens of enigiemand in die skare nie. En hul “lyfwagte” maak seker niemand waag dit naby hulle nie.
Ontmoet Kim Jong-un se “weermag skoonhede”, wat glo na die Spele gestuur is om die wêreld te betower en te laat vergeet van die menseregtevergrype in sy land. Hy span dié sjarmante troepe glo in om die wêreld te probeer oorrompel en die aandag af te lei van sy kerndreigemente wat sy Amerikaanse ampsgenoot, pres. Donald Trump, so warm onder die kraag kry. Trump het hom immers tartend “Little Rocket Man” gedoop . . .
Die rasieleiers is persoonlik deur Kim se topamptenare uitgekies en kom glo almal uit elitegesinne in dié land. Hulle moet 1,6 m in hul sokkies staan en is almal in hul 20’s, berig The New York Times.
Dis vir Kim ’n resep wat werk: Hy het sy vrou, die beeldskone Ri Sol-ju (28), hoeka ontmoet toe sy in 2005 een van die rasieleiers op die Asiatiese Atletiekkampioenskapsbyeenkoms in Incheon, Suid-Korea, was.
Maar die groep nuwe rasieleiers is nie al geheime wapen in Kim se propagandamasjien nie. Sy ewe mooi jonger suster, Kim Yo-jong (30), het ook die kollig gesteel, eers by die Spele se opening in Pyeongchang en toe die dag daarna.
’n Video van haar wat die Amerikaanse visepresident, Mike Pence, by die openingseremonie ’n “vuil kyk” gee, het soos ’n veldbrand aanlyn versprei. Pence was nie beïndruk nie en het haar skaamte- loos geïgnoreer. Hy kla Noord-Korea probeer die Olimpiese Winterspele “kaap” met die kwansuise “eenheid” met SuidKorea.
Die volgende dag het die “Ivanka Trump van Noord-Korea” – soos Kim se suster al beskryf is – by die presidentspaleis opgedaag met ’n handgeskrewe uitnodiging van haar broer aan die Suid-Koreaanse staatshoof, pres. Moon Jae-in. Sy is die eerste lid van die Kimdinastie wat in 65 jaar hul voete in Suid-Korea sit – en die wêreldmedia kon nie genoeg van haar kry nie.
Sy is oor die wêreld heen op TV-nuusstasies bespreek, van haar haarstyl tot haar uitrusting en sproete. Dat haar naam op Amerika se swartlys oor menseregtevergrype pryk, het dié keer nie veel lugtyd gekry nie.
NATUURLIK sien baie kritici verby die pragtige prentjie wat nou die “menslike kant” van Noord-Korea aan die wêreld moet wys. Party mor Kim wil die aandag aflei van sy land se diepgewortelde probleme. Sowat 10,5 miljoen van sy landgenote is volgens The New York Times ondervoed, en talle ander is in konsentrasiekampe geboender nadat
hulle hom probeer teengaan engaan het.
Sy jongste poging om met sy propaganda die wêreld ’n rat voor die oë te draai het al weke gelede begin toe hy die popster Hyon Song-wol – die voormalige hoofsanger van sy gunstelingvrouesanggroep, Moranbong – Seoel toe stuur om Olimpiese fasiliteite te besoek voor die Spele begin. Dié was eens glo sy liefie, klap die skindertonge.
Toe volg die rasieleiers en sy suster – en TV-kykers wat vasgenael voor die Spele sit, begin swymel en koer.
Die rasieleiers is die “sterre van die Olimpiese Spele”, meen die Amerikaanse kletsprogramaanbieder Jimmy Kimmel.
Oral waar dié groep vroue gaan, word hulle deur die media oorval en pluk mense selfone uit. Sowat 1 000 polisielede, sekuriteitsagente en handlangers moes bontstaan om honderde joernaliste weg te hou toe die vroue ’n bietjie op die strand naby hul hotel wou gaan uitspan, berig ABC.
Die groep het per skip na Suid-Korea gereis en rits daar in agt busse rond, vergesel deur ses polisiemotors met loeiende sirenes. Noord-Koreaanse veiligheidspersoneel, geklee in swart winterjasse en pelsmusse, beweeg oral saam met die vroue en die NoordKoreaanse atlete. Op video’s kan jy sien hoe dié wagte nader staan sodra die rasieleiers of atlete met mekaar begin gesels. Hulle is informante wat ná die Spele aan Kim terugvoer moet gee oor hoe elke rasieleier gevaar het, het ’n voormalige Noord-Koreaanse polisiebeampte aan CNN vertel.
Die vroue gaan tuis in ’n afgeleë
maar luukse oord by die Inje Speedium, ’n renbaankompleks aan die voetheuwels van die skilderagtige berg Sorak in die distrik Inje in die ooste van die land, berig The New York Times.
Hulle bly daar in 108 wooneenhede. Die meeste deel ’n kamer, sê Kim Taeeun, ’n woordvoerder van die oord, waar 21 Noord-Koreaanse verslaggewers ook tuisgaan.
Die rasieleiers geniet hul maaltye in ’n balsaal van die aangrensende hotel, sê Kim Tae-eun. Die vroue gaan eet in groepe van sowat 30, met twee ouer manlike oppassers by elke groep. Hulle stap in gelid in dubbele rye, en wanneer hulle klaar geëet het, voer hulle weer net so ’n netjiese stappie van twee minute uit terug na hul kamers.
Selfs uitstappies na die badkamer gebeur in groepe.
DIE Noord-Koreaanse atlete, joernaliste en rasieleiers se verblyf word deur die Suid-Koreaanse regering betaal. Die gasheerland het meer as R30 miljoen hiervoor opgedok.
Maar net twee van die 22 NoordKoreaanse atlete wat aan die Spele deelneem, het vir deelname gekwalifiseer. Hulle is die figuurskaatspaartjie Ryom Tae-ok (19) en Kim Ju-sik (25).
Pres. Moon het die 20 ander en die res van die Koreaanse groep genooi in ’n poging om spanning tussen die twee buurlande, grootliks weens Noord-Korea se kern- en missielprogramme, te verlig.
Maar Moon se gewildheid het ’n knou gekry oor sy hand van vriendskap aan die bure. Party landgenote het selfs betoog toe dit bekend word Suiden Noord-Korea gaan saam aan die Spele deelneem.
Teen druktyd het Noord-Korea nog nie ’n medalje gewen nie, en die genoemde figuurskaatspaartjie was toe nog hul enigste hoop. Die ysskaatsers is ter voorbereiding van die Spele in Montreal afgerig deur die Kanadees Bruno Marcotte, wat vertel hoe erg die kultuurskok vir die twee in Kanada was. Hulle het hom onder meer gevra hoekom mense op straat nie werk nie, en hulle was verward oor die konsep van skaats as ’n lekkerte eerder as ’n kompetisie.
Inderdaad ’n vreemde spulletjie . . .