‘DAG ZERO’: SO KON ONS ALLES AFSPOEL
Ek het met groot belangstelling “So het ons ‘Dag Zero’ oorleef ” deur Dibi Breytenbach gelees (8 Februarie).
Ek is bevrees haar vertellings van verstopte toilette en toiletpapier wat nie afgespoel word nie, kan mense ontmoedig. Ek, my vrou en twee dogters het altyd ons toiletpapier afgespoel en ons toilet het nooit verstop nie.
Haar opmerkings dat sy die geiser afgeskakel het sodat dit nie uitbrand sonder water nie, sê my sy het nie ’n watertenk gehad nie. Dit sou baie van haar probleme opgelos het.
Ons “Dag Zero” het in Mei 2016 aangebreek, maar ons het sedert Augusus 2015 sporadiese watervoorsieningsprobleme gehad. In November 2015 het ek ’n 5 000 L-tenk gekoop, dit aan die munisipale watertoevoer na my erf verbind (tans verbode in Kaapstad) en die watervloei met ’n balklep gereguleer. So kon ons munisipale water berg vir tye van onderbrekings. Wanneer die watertoevoer herstel is, het die tenk weer vol geloop met munisipale water.
Dié tenk was te na aan die heining om reën op te vang en daarvoor het ek ’n tweede tenk gekoop en aan die huis se geute gekoppel, maar ook aan die eerste tenk. Water kan tussen die tenks vloei.
Ons het ’n handwasmasjien vir kampeerders gebruik. Daarin kon ons 2 kg klere was, waarna ons die gebruikte waswater in houers gegooi het om die toilette mee te spoel. Nadat die klere in skoon water uitgespoel is, is die uitspoelwater gebruik vir die volgende bondel wasgoed. En dan is dié water weer vir die toilet gebruik.
So was dit nooit nodig om gebruikte toiletpapier in vullisdromme of iets te gooi nie; daar was altyd spoelwater. STEVEN, VRYHEID