Imran Khan se derde vrou net ’n pion?
Die oudkrieketheld Imran Khan se transformasie word deur sy bruide weerspieël. Vanwaar die konserwatiewe derde vrou?
OP SY dag was hy die liefling van die sportwêreld; so aantreklik soos ’n filmster en ’n talentvolle krieketkaptein wat sy span tot sukses gelei het. Maar Imran Khan is lankal klaar met sy lewe as rondritsersportster, want sy droom is om eendag Pakistan se eerste minister te word. En nêrens is sy transformasie duideliker te sien as in die drie bruide wat hy deur die jare gekies het nie.
Die gewese Pakistanse krieketkaptein het pas die derde keer afgehaak en die formele trouportret wat die bruidspaar uitgereik het, is ligjare verwyder van die paparazzifoto’s toe hy in 1995 met die skatryk Britse erfgenaam Jemima Goldsmith trou.
Dis ook anders as die byna koninklik elegante foto’s 20 jaar later toe hy met mev. Khan die tweede, Reham, trou.
Op haar troudag was die beeldskone Jemima met haar lang, los hare, skamerige glimlaggie, sexy wit rok en ’n gesofistikeerde wit baadjie die toonbeeld van iemand wat gewoond is aan die beste en niks hoef te bewys nie.
Toe Imran met Reham trou, was dit meer besadig. Die bruid het ’n kopserp gedra en haar gesig was stralend; die twee het ’n glansryke prentjie geskep.
Maar toe die voormalige sportheld on- langs die derde keer trou, was dit ’n heel ander saak. Bushra, sy derde bruid, was van kop tot tone in ’n grys kleed bedek en haar gesig was agter ’n rooi sluier versteek. Aan haar sy was haar bruidegom geklee in ’n donker baadjie oor ’n wit
shalwar kameez, ’n tipiese Pakistanse uitrusting wat vir ’n staatsman geskik is.
Dit het gelyk asof die sportheld van destyds hom nou formeler gedra.
Maar hoe Imran hom ook al draai, daar is altyd ’n stertjie aan die storie. Dus het selfs die stemmige troufoto ’n stortvloed skinder veroorsaak.
Die vorige mev. Khan het mond uitgespoel oor haar eks se derde troue. Hy is uit voeling met die moderne Pakistan as hy gedink het so ’n foto sou stemme wen, het Reham laat hoor. “Om ’n vrou van kop tot tone te versluier het ’n klomp mense vervreem,” het sy aan die Britse koerant Daily Mail gesê. “Dis nie goed ontvang nie. Vier maande voor die Pakistanse verkiesing is dit politieke selfmoord.”
Reham het haar 65-jarige eks ook daarvan beskuldig dat hy haar verkul het en veroorsaak het dat Bushra se eerste huwelik misluk het.
Imran het onmiddellik die publiek gevra om sy nuwe vrou se “baie konserwatiewe” familie te respekteer. “Al wat ek van my ondersteuners vra, is dat hulle bid dat ek die persoonlike geluk vind wat my, behalwe ’n paar jaar, nog altyd ontduik het,” het hy getwiet.
IMRAN word as een van die wêreld se beste veelsydige spelers ooit beskou en as die beste krieketspeler wat Pakistan al opgelewer het. Die formidabele bouler en briljante kolwer het in 1992 ’n kultusfiguur in sy land geword toe hy ’n onervare span tot ’n oorwinning in die Wêreldbeker-eindstryd lei. Wat die oorwinning nog ongeloofliker gemaak het, was dat Imran op 39 toe al lank in die tand begin raak het vir ’n sportman wat op daardie vlak deelneem.
Imran, wat uit ’n welgestelde familie van die Pakistanse stad Lahore kom, was op kosskool in Londen en het daarna aan die Oxford-universiteit studeer. Sy sporttalent het hom toegang tot die binnekamers van die Britse rykes gegee. Drie jaar ná sy Wêreldbeker-oorwinning is hy met Jemima, die pragtige dogter van die Britse geldmagnaat James Goldsmith, getroud. Sy was net 21 jaar oud.
Jemima, destyds ’n vriendin van prinses Diana, het die Islam-geloof aanvaar en die pasgetroudes het na Pakistan verhuis. Hier het sy die amptelike taal, Oerdoe, aangeleer en by kwessies betrokke geraak wat vir haar saak maak: die regte van vlugtelinge en vryheid van inligting. Sy het ook vir die Britse media geskryf en ’n modereeks begin. Sy en Imran het twee seuns, Sulaiman Isa (21) en Qasim (18).
Maar die lewe in Pakistan was nie vir Jemima maklik nie. Toe Imran as jong seun Engeland toe is, het sy ma hom ge-
waarsku: “Moenie ’n Engelse vrou huis toe bring nie. Dit sal vir haar moeilik wees om by ons godsdiens en kultuur aan te pas.” En dit was ook so.
Toe Imran ál meer by die politiek betrokke raak, het Jemima, wat van Joodse afkoms is, onder beledigings van sy teenstanders en godsdiensleiers deurgeloop.
In 2004 het die egpaar aangekondig hul paaie gaan skei. Jare later het Imran toegegee Jemima was dalk destyds te jonk en onervare om die uitdagings van sy politieke loopbaan te hanteer.
Dit lyk darem of hulle op goeie voet is. Jemima (44) en Imran het vriende gebly, en toe hy met Reham trou, het sy getwiet: “Ek sal altyd lief bly vir Pakistan. Danksy my seuns en die liefde wat ek daar ervaar het, voel ek soos ’n ere-Pakistani.”
Reham (44), ’n uitsaaijoernalis, is in Libië gebore en het in Engeland grootgeword. Sy en Imran het mekaar ont- moet toe sy in 2012 na Pakistan verhuis en daar ’n onderhoud met hom voer. Hul verhouding is tot in 2014 geheim gehou.
Net soos Jemima het Reham egter gou besef dis nie aldag maklik om met ’n nasionale held getroud te wees nie. Hul huwelik het skaars 10 maande gehou.
Agterna het sy beweer sy was die slagoffer van ’n haatveldtog. Teenstanders het haar daarvan beskuldig dat sy haar man se roem gebruik het om haar eie agenda te bevorder. Sy is ook gekritiseer omdat sy glo varkworsies voorgesit en kalerige klere gedra het.
Kyk ’n mens nou na Bushra se bruidsuitrusting, is daar geen kans dat sy ooit van kalerige klere beskuldig g sal word nie.
Op die internet is net een foto waarop ’n mens haar gesig kan sien. Dis ’n do dowwerige foto van ’n pr pragtige vrou met ’n k kopserp.
Nie veel inligting is oor die derde mev. Khan beskikbaar n nie; net dat sy vyf k kinders het, in haar 40 40’s is en Imran se gee geestelike raadgewer is. Bush Bushra, ook bekend as Pinki Pir, Pir is verlede jaar van haar man geskei. Albei ontken Imran was die rede hiervoor.
Reham glo dit nie. Sy het aan die Britse koerant The Times gesê die twee het “jare lank” ’ n affair gehad en het bygevoeg Imran is nie ’n “eerlike man” nie.
Imran het dalk gehoop sy keuse van ’n bruid sal goed by sy politieke aspirasies pas omdat Bushra se konserwatiewe agtergrond sy agenda uitstekend pas.
Maar Reham beskryf die troue as ’n publisiteitsfoefie. “Hy wil wys hy het van Soho na Soefisme beweeg. As dit is wat hy probeer doen het, het dit nie gewerk nie. Niemand is om die bos gelei nie.”
Imran, ’n lid van die Tehreek-e-Insafparty, het in 2013 probeer eerste minister word, maar by die stembus verloor. Daarna het hy ’n beeld van godsdienstige toewyding gekweek; hy dra gebedekrale en haal uit die skrif aan.
Nadat Nawaz Sharif verlede jaar deur die Pakistanse hooggeregshof as eerste minister uitgeskop is omdat hy geldelike bates verdoesel het, lyk dit of Imran opnuut van daardie topposisie droom.
En dié keer kan die derde mev. Khan hom tydens sy veldtog bystaan en geestelike leiding gee. BRONNE: SKY NEWS, DAILYMAIL.COM, INDIANEXPRESS.COM, THESUN.CO.UK, HELLOMAGAZINE.COM, GEOTV.COM, TELEGRAPH.C