SHIA OOR MA SE VERKRAGTING
HY IS vol woede. En in sy eerste onderhoud sedert hy in 2017 in hegtenis geneem is, vertel die akteur Shia LaBeouf waarom. Shia moes op 10 beleef hoe sy ma, die kunstenaar Shayna Saide, verkrag word, het die Transformers-ster aan die tydskrif Esquire gesê. Hy vertel hy het die verkragting hoor plaasvind.
“Toe ek verlede jaar rehabilitasie ondergaan, het hulle gesê ek ly aan posttraumatiese stres,” het hy gesê.
Shia (31), wat sedert 2016 met die aktrise Mia Goth (24) getroud is, se inhegtenisneming was weens openbare dronkenskap en wanordelike gedrag.
Gelekte beeldmateriaal toon hoe Shia oor sy “miljoenêrprokureurs” spog en ’n rassistiese tirade voer.
“Die eerste keer dat ek in hegtenis geneem is, het dit uit dieselfde k** gespruit,” erken hy. “’n Ou het op ’n parkeerterrein met sy motor teen my ma se motor gestamp, en my kop het uitgehaak. Ek het gedink: Jy moet jou ma se pyn wreek. Toe sit ek die ou met ’n mes agterna. My lewe lank voel dit vir my of iemand weer by ons inbreek.”
Hy bieg hy slaap met ’n vuurwapen onder sy kussing.
Die ster, wat duidelik ’n sagte plekkie vir sy ma het, vertel hy het haar na ’n Kanye West-konsert geneem. “Sy is natuurlik behep met Kanye West. Toe ek haar agter die verhoog neem, was hy f***** dierbaar met haar.”