DRAMAS RONDOM ’N RAAISELDOOD
Skokke en skandes is volop in die intrige wat in die opspraakwekkende moordverhoor van Jason Rohde ontvou – hier is van die sleutel-elemente
SPANNING oor ’n vurige affair wat in ’n laatnagrusie in ’n spoghotel op ’n bekende wynlandgoed oorkook; die ontstelde blondekopvrou wat in haar wit kamerjas agter haar eiendomsbaasman aanhardloop omdat hy saam met kollegas wil gaan drink . . .
En toe, die volgende oggend, haar lewelose liggaam agter die badkamerdeur met die koord van ’n haartang om haar nek.
Dit is maar net ’n deel van die dramatiese getuienis die laaste tyd in die WesKaapse hooggeregshof in Kaapstad waar Jason Rohde aangekla word van die moord op sy aanvallige vrou, Susan.
In die proses is die skyn van ’n gelukkige en liefdevolle huwelik stuk vir stuk afgebreek, onder meer deur die onthulling in die hof van die beledigende teksboodskappe wat hulle vir mekaar gestuur het.
Dit het nie lank geduur voor die polisie besluit het hulle glo nie die weergawe van die voormalige uitvoerende hoof van Sotheby’s International Realty in Suid-Afrika nie.
Hy het beweer sy vrou het haarself in die oggendure van 24 Julie 2016 opgehang terwyl hy niksvermoedend in hul hotelbed op die Spierlandgoed by Stellenbosch geslaap het.
Binne weke is die sakeman by hul Johannesburgse spoghuis in hegtenis geneem en van moord aangekla. Sedertdien is dié eens gelukkige paartjie, asook Jason se destydse donkerkopminnares, Jolene Alterskye, gereeld in die nuus.
Sedert die begin van die opspraakwekkende moordverhoor verlede Oktober het die staat reeds patoloë, polisiebeamptes, ’n Spier-nutsman, kollegas van Jason en familielede van Susan laat getuig om sy skuld te probeer bewys.
Jason hou vol Susan, die ma van hul drie dogters, het haarself om die lewe gebring tydens die Sotheby’s-konferensie waarheen sy hom daardie naweek vergesel het.
Maar hy het van die begin af in ’n polisieverklaring erken spanning het tussen hulle gewoed oor sy affair.
Die verhoor is voor die Paasnaweek verdaag en word eers op 23 April hervat. Intussen wonder almal: Sal Jason se destydse skelmpie deur die staat gevra word om te getuig – en wat sal sy dan alles vertel?
Hier is van die dramatiese onthullings wat tot dusver gemaak is in die verhoor van die sakeman wie se lewe in ’n oogwink soos handomkeer verander het.
Sal Jason se destydse skelmpie deur die staat gevra word om te getuig?