PANGEBRAAIDE STEAK MET RISSIE EN SUURLEMOEN
Dit is belangrik dat steak altyd kamertemperatuur is voor dit gaargemaak word; dit verseker dat die vleis lekker sappig bly en eweredig gaar word. GENOEG VIR 2 MENSE Bereiding: 10 min. Gaarmaak: 10-15 min. Rus: 5-10 min. 1 x 450-500 g-klub- of
T-been-steak sout en peper 10 ml (2 t) olyfolie 30 ml (2 e) botter 4 knoffelhuisies, met die skil nog aan en gekneus 2 rooi brandrissies,
fyngekap 1 suurlemoen se gerasperde skil en 15 ml (1 e) van die sap 4 tiemietakkies seesoutvlokkies, indien
verkies
1 Geur die steak alkant goed met die sout en vars gemaalde peper. Smeer met die olie.
2 Verhit ’n groot kleefvrye pan tot rookwarm. Sit die steak in die pan en seël tot ’n goudbruin kors aan die een kant vorm (sowat 1 min.). Draai die steak om en herhaal.
3 Hou die steak vas met ’n knyptang en braai die vleis 30 sek. aan die vetkant.
4 Verlaag die hitte effens en voeg die res van die bestanddele by. Braai die steak nou 2-3 min. per kant of tot gaar soos verkies.
5 Sit die steak op ’n bord en giet al die pansappe oor. Laat rus 5-10 min. Sprinkel seesoutvlokkies oor, indien verkies. Sit dit voor.
Onthou, die steak raak nog gaarder terwyl dit rus. Moet dit dus nie te veel braai nie, anders sal dit te gaar en uitgedroog wees teen die tyd dat dit geëet word.