Ready Player One
Aksie. Met Tye Sheridan, Olivia Cooke, Ben Mendelsohn en TJ Miller. Regisseur: Steven Spielberg. 13TOSG. Het op 29 Maart begin.
Waaroor gaan dit?
Dit is die jaar 2045 en die stad Columbus, Ohio, is soos die grootste deel van Amerika op sy knieë. Probleme soos oorbevolking, armoede, hongersnood en klimaatsverandering vier hoogty. Mense vlug uit dié ellende na ’n skynwêreld bekend as Oasis.
Toe die skepper van Oasis, James Halliday (Mark Rylance), sterf, steek hy sy fortuin in die speletjie weg. Wie dit ook al vind, word nie net die nuwe baas van dié skynwêreld nie; hulle erf ook sy fortuin van $240 biljoen (R2,75 triljoen).
Die onwaarskynlike held
Wade Watts (Sheridan) en miljoene ander soos hy betree elke dag dié skynwêreld. Hy gaan skool in die simulasie terwyl sy ma twee werke het: as telebemarker en gesellin by ’n aanlyn bordeel. Wade is agter James, wat ’n passie vir die 1980’s-popkultuur het, se fortuin aan.
Die fliek is gegrond op die Amerikaanse skrywer Ernest Cline se gelyknamige wetenskapsfiksieboek van 2011. Cline, wat op 29 Maart, die dag toe die fliek uitgereik is, sy 45ste verjaardag gevier het, sê die fliekweergawe is sy “gunsteling-Spielberg-fliek”.
Die inspirasie
Spielberg (71) en die Star Wars-skepper, George Lucas (73), is twee van Cline se groot helde. In sy topverkoperboek moet die hoofkarakter verwysings na popkultuur van die 1980’s ontrafel wat grotendeels op Spielberg se flieks gegrond is. Toe beland Spielberg boonop in die regisseurstoel van die rolprentweergawe van sy boek.
Die Jurassic Park-skepper het geweier om na sy eie flieks in Ready Player One te verwys sodat dit nie lyk asof hy sy eie beuel blaas nie. Tog het die span verwysings probeer insluit waar hulle kon. Die motorkeuse van Wade se avatar in die skynwêreld is byvoorbeeld ’n DeLorean soos in die fliek Back to the Future en hy word in ’n stadium deur die T. rex van Jurassic Park agternagesit.