’N GESIN SE GEHEIME UITGELAP
’N GESKIEDENIS VAN AFFAIRS
Susan se swaer, Peter Norton, het getuig haar pa, Neville Holmes, het ook ’n buiteegtelike verhouding gehad. Hy het getuig dit het ’n groot impak op haar gehad.
Jason se regsverteenwoordiger Pete het in die hof aangevoer Susan se familie het Jason soos ’n misdadiger laat voel en hom verstoot toe hulle van sy affair uitvind.
Toe Neville saam met nog familielede by die hotelkamer opdaag waar Susan se lyk gevind is, het hy Jason gevra om sy hande te wys, het Peter getuig. Peter sê daar was nie merke aan Jason se hande nie, maar dat Jason erken het hulle het voor haar dood gestry.
INTIEME WHATSAPPS
Beledigende WhatsApp-boodskappe het tussen Jason en Susan gevlieg tydens die konferensie by Spier, het twee selfoondeskundiges getuig.
Terselfdertyd het Jason liefdevolle boodskappe aan Jolene gestuur. “Ek wil niks meer hê as om by jou te wees nie,” het hy geskryf. En Jolene het geantwoord: “My pikkewyn vir altyd.”
Daarteenoor het Jason vir Susan geteks: “Ons is verby.”
Kort voor haar dood het Susan en Jolene ook vir mekaar kras boodskappe gestuur.
Die verslag met die Rohde-egpaar se WhatsApp-boodskappe, wat by die hof ingedien is, het gewys dat hul verhouding wipplank gery het nadat Susan van die verhouding met Jolene uitgevind het.
Soms was hul boodskappe die ene liefdeswoordjies; ander dae weer vol beledigende skelwoorde.
GELDPROBLEME
Tydens Jason se hofverskyning in Februarie het Pete in die hof aangekondig dat Jason se finansies net voldoende sou wees om die koste van een advokaat en die verdediging se spesialisgetuies te dek.
Pete, asook advv. Ross McKernan en Stacey Webb, moes hulle aan die saak onttrek. Adv. Graham van der Spuy, wat onder meer in mediese regswerk spesialiseer, sou die saak verder saam met Jason se prokureur, Daniel Witz, hanteer.
Hoewel Jason voorheen glo sowat R100 000 per maand verdien het, sukkel hy glo nou finansieel en skuld hy sy regspan honderdduisende rande, het Netwerk24 berig.
Die Rohdes se spoghuis in Johannesburg is sowat twee maande voor Susan se dood vir R10,3 miljoen in die mark geplaas en sedertdien vir ’n onbekende bedrag verkoop.
Die huis was glo in Susan se naam en die geld is ná die verkoop van die huis in ’n trustrekening geplaas wat Jason nie nou kan gebruik nie.