Bottomless Coffee Band
Dié duo se tweede album maak opslae – en hulle sing vir die eerste keer ook in Afrikaans
Liefde met die eerste oogopslag
Lourens en Esté Rabé, die lede van dié rockfolkduo, is nie net sangmaats nie; hulle is die afgelope vyf jaar ook huweliksmaats. Hulle het mekaar in 2010 as studente ontmoet toe albei in die Stellenbosch Universiteitskoor gesing het. “Ek het by die koor aangesluit as deel van my opleiding (in drama en klassieke sang) en Lourens wou net graag gaan toer saam met sy vriende wat in die koor was,” spot Esté (27).
Lourens (30) het toe pas sy B.Com. (regte)graad voltooi en beleggingsbestuur begin studeer. Hulle het oor ’n paar koppies koffie besef hulle deel ’n belangstelling in bluesmusiek. ’n Week nadat hulle begin uitgaan het, het hulle die Bottomless Coffee Band gestig. En ná agt jaar is dit steeds aan die brand. Die paartjie kan tussen hulle 12 instrumente bespeel – van kitaar, trekklavier en tromme tot die ukelele – en span al dié instrumente by hul vertonings in.
Wat’s in ’n naam?
Esté, ’n boorling van Graaff-Reinet, het as dramastudent gereeld koffie in die hand op die Matie-kampus rondgestap. Lourens, ’n Kapenaar, is op sy beurt geïnspireer deur die koffiekultuur van die Moederstad se koffiekroeë en hoe mense ure lank daarin verlore kan raak. “Toe Lourens eendag van die klas af stap en wonder watter naam kan werk, het Bottomless Coffee Band by hom opgeduik. Vandag verteenwoordig dit ’n atmosfeer wat ons hoop ons
Sing in Afrikaans
musiek kan hê: ’n ruimte waar mense bymekaar kan kom om kreatief te wees,” sê Esté.
Die egpaar woon in die Paarl in die Boland. Ná die sukses van hul Engelse debuutalbum, Room with a View (2014), kon hulle nie wag om nuwe musiek op te neem nie. Hul opvolgalbum, Anthelia, spog nou met twee Afrikaanse liedjies, Ek Sal Wag en Lig Wat Skyn. “Ons het op die album probeer dat ons sterk punte mekaar aanvul: Lourens se rock-agtergrond en fantastiese kitaarspel en my klassieke stemopleiding,” vertel Esté. “Die woord Anthelia beteken die gawe om engele op aarde te kan sien en ons het dit geïnterpreteer as die gawe om die mooi in alles en almal om ons te kan raaksien.”