Local Loca Is Lekker
Sowaar, daar’s ’n plek . . . een waar volwassenes cowboys en kroeks speel en selfs een waar honde vliegtuie beskerm – en dit teen voëls.
Die bekroonde TV-aanbieder Coenie de Villiers neem kykers nou op reis na dié en nog ander onverkende plekke in ’n nuwe VIA-reeks, Daar’s ’n Plek.
“Die reeks gaan oor mense wat my interesseer; dikwels doodgewone mense wat uitsonderlike dinge doen en vermag,” vertel Coenie oor die dokumentêre werklikheidsprogram van 13 episodes wat vanaf 18 April af uitgesaai word.
“Ek wil graag hê mense moet oor my skouer loer en ná die tyd vir mekaar sê: ‘Ek het dit nooit geweet nie!’”
Uiteenlopende stories word in die reeks vertel – van ma’s agter tralies tot ’n ma wie se seun ’n stryd teen kanker voer. Daar word ook gefokus op die werk van taxibestuurders en dié van begrafnisondernemers wat oorledenes op hul laaste reis voorberei.
“Dis soms snaaks en ongewoon, soms baie intiem en selfs ’n bietjie hartseer,” sê Coenie oor die reeks.
Die verfilming van die eerste episode was die ene opwinding.
“Ons jaag heen en weer oor O.R. Tambo-lughawe se aanloopbane saam met die opgeleide honde wat voëls moet wegjaag om te verhoed dat hulle by vliegtuigenjins ingesuig word,” vertel Coenie.
“Die uitvoerende vervaardiger en regisseur van die reeks, Linda de Jager van Endgame Media, het ’n wonderlike aanvoeling daarvoor om die beste uit ’n storie te haal – die spreekwoordelike ‘storie agter die storie,’” voeg hy by.
Ná 17 jaar in die bedryf word hy steeds deur mense se verhale meegevoer.
“In hierdie reeks gebeur dit soms op die mees onverwagte maniere. Byvoorbeeld die verhaal van ’n ma wat alles probeer om haar seuntjie wat kanker het se hoop op oorlewing te verbeter. Ons volg haar agter die skerms en vertel die verhaal vanuit ’n oogpunt wat kykers bitter min sien.
“Omdat ons land sy probleme het, is ’n mens geneig om dikwels die goeie dinge uit die oog te verloor. Dis ’n wonderlike plek. Met hierdie reeks sien ek opnuut ons mense is inherent goed en wil net die beste vir Suid-Afrika en die land se mense hê.”
Daar’s ’n Plek word Woensdae om 20:00 op VIA (DStv-kanaal 147) uitgesaai.