Geldsake: Voorsorg ingeval die broodwinner verdwyn

Julle het dalk danksy jou maat nie geldprobleme nie, maar dis belangrik dat jy voorsorg tref vir die dag as hulle nie meer daar is nie

JOU lewensmaat was dalk nog altyd die broodwinner in jul verhouding en was vir al jul lewensonkoste verantwoordelik. Maar sal jy alleen oor die weg kan kom wanneer dit nie meer die geval is nie?

Daar is natuurlik verskillende redes waarom jy dalk nie meer op jou lewensmaat se inkomste sal kan staatmaak nie. Julle kan besluit om te skei, hy of sy kan hul werk verloor of selfs sterf.

Het jy al ooit gedink of jy dan vir jouself sal kan sorg? En wat van enige kinders wat julle saam het?

As jy nog nie daarvoor beplan het nie, begin sommer vandag nog. Jou Geldsake gesels met The Lemon Lady, oftewel die finansiële beplanner Charné van der Walt, oor die drie belangrikste voorsorgmaatreëls om te tref.

MAAK SO MIN HANDEL1 SKULD MOONTLIK

Skuld soos dié op krediet- en winkelkaarte het tipies die hoogste rentekoerse. ▶ As jy baie skuld het en met betalings agterstallig raak, sal jy ’n swak kredietrekord kry. Gevolglik sal jy nie maklik nuwe lenings vir byvoorbeeld eiendom, studie of ’n motor kry nie; juis wanneer jy dit die nodigste het. ▶ Volgens wet mag potensiële nuwe werkgewers jou kredietrekord nagaan. Hulle vra gewoonlik tydens jou werkonderhoud of gedurende die aansoekproses toestemming daarvoor. As jy ’n swak skuldrekord het, kan hulle dalk besluit om jou eerder nie aan te stel nie – veral as dit ’n pos is waar jy met finansies gaan werk.

2 SPAAR VIR ’N NOODFONDS

Die ideaal is dat jy eindelik genoeg geld moet wegsit om jou motor- en huispaaiemente minstens ses maande lank te kan betaal. Maar moenie dat die grootte van so ’n ideale bedrag jou uit die staanspoor ontmoedig nie. Begin net dadelik spaar wat jy ook al kan afknyp en bou so jou noodfonds op. Oorweeg ’n bedrag wat maandeliks met ’n debietorder van jou alledaagse rekening na ’n spesiale spaarrekening of belegging oorbetaal word.

3 MOET LIEFS NIE OPHOU WERK NIE

Charné sê sy ervaar dikwels dat een persoon in ’n verhouding heeltemal ophou werk omdat die ander (die broodwinner) goed geld verdien.

Dit kan egter ’n yslike fout wees, meen sy.

As jy dan weer uit die bloute moet begin werk, sal dit dalk moeilik wees om die mark weer suksesvol met die nodige werkervaring te betree. Al verdien jou lewensmaat sakke vol geld, probeer om steeds jou werkervaring en CV relevant te hou; al werk jy net halfdag of op ’n vryskut- of kontrakbasis.