Stefan Ludik se troue so uit 'n sprokie
StefanSt Ludik en sy bruid was op hul groot dagd ewe tuis voor die kansel as voor die kameraska
DIE sonnige herfsdag en prentjiemooi toneel van byna 100 deftig uitgevatte bruilofsgaste in die skadu van die groot dennebome herinner aan die stel van ’n fliek wat op ’n sprokiestroue uitloop. ’n Mens verwag eintlik enige oomblik die bevel: “Ligte, kamera, aksie!” Maar dit kom nie; dis ’n regte troue dié. En al is Stefan Ludik (37) en Anelle Bester (33) albei in die vermaakbedryf, is hier vandag g’n sprake van verhoogvrees nie – net pure vreugde en vrolikheid.
Die bruidegom is ’n sepieveteraan met rolle in Egoli, Binnelanders en Isidingo agter sy naam. Onder musiekliefhebbers is hy gewild as Elvis Se Seun, wat meestal popliedjies sing.
Sy bruid, ’ n agent by die talentagentskap Legends, is ewe gemaklik voor die kameras en het al in 7de Laan en
Binnelanders gespeel. Dis voorwaar ’n troue so reg uit die mooiste sepietoneel.
Nou maak Stefan en sy vier strooijonkers uitgelate grappies terwyl hulle na die buitelugdiens by Monte de Dios in Pretoria stap. Die karaktervolle gebou op die agtergrond herinner aan ’n Italiaanse villa. Iewers runnik perde. Idillies.
Toe Jasmine Rae se When I Found You begin speel, stap Anelle en haar pa, Paul Bester, met die lang, kronkelende paadjie af tot waar Stefan breed vir haar staan en glimlag. Die bruid lyk soos ’n prinses in haar skitterwit Simon Rademan-skepping getooi met Swarovski-kristalle en pêrels. Haar donker hare is losweg teen haar kop vasgesteek en beklemtoon haar oop rug, wat met kant omvou is.
Terwyl gaste oor die lieflike vallei voor hulle tuur, bid ds. Gavin Meistre dat die paartjie se liefde vir mekaar sal groei. Hy sê ’n huwelik word op respek en liefde gegrond en hulle moet mekaar se fisieke en emosionele behoeftes vervul.
Gaste pink ’n traan toe Anelle en Stefan hul beloftes aan mekaar voorlees. “Ek weet nie wat ek gedoen het om jou te verdien nie,” sê Stefan. “God het my geseën met jou. Hy het jou aan my geleen. Vir my is jy mooier as die Namib; mooier as die see in my drome; mooier as ’n mens. Ek is lief vir jou met alles wat ek is.”
Anelle is speels in haar belofte en sê hul liefde is soos ’n sprokie. “Jou hart is myne en ek sal hom oppas. As ons die Lotto wen, sal ek saam met jou ’n plaas koop. As ons iemand die Lotto se geld skuld, sal ek saam met jou by McDonald’s hamburgers verkoop. Ek het jou lief, my liefste lief. Nou en vir altyd.”
Toe dit haar beurt is om ja te sê, antwoord sy: “Tienduisend keer ja!” Groot applous bars los toe Anelle en Stefan mekaar hul eerste kus as getroudes gee.
NÁ DIE seremonie peusel die gaste aan vingerhappies terwyl die bruidspaar en hul gevolg foto’s laat neem. Tydens die fotosessie loer Anelle deur haar sluier na Stefan en die twee steel ’n vurige soen. Hugo Ludik, Stefan se broer en sanger van die gewilde mannegroep Adam, is een van die strooijonkers. Hy terg sy ouboet alte lekker.
Die Binnelanders-akteur Hykie Berg is ook in die gevolg. Hy en die bruidegom is al hegte vriende vandat hulle mekaar destyds op die Egoli-stel ontmoet het terwyl hulle albei in dié sepie gespeel het. ’n Jare lange vriend, Travis Fraundorfer, en Stefan se laerskoolmaat uit Namibië Simon Frank is die ander strooijonkers.
Anelle se gevolg bestaan uit haar ouer suster, Michelle Bester, ’n vriendin, Zizan du Preez, en Danieka du Plessis, Hugo se meisie. Die strooimeisies is in sagpienk geklee, elk met ’n blommekroon op die kop. Hulle gesels vrolik en geniet ’n glasie vonkelwyn terwyl foto’s geneem word. Die ma van die bruid, Agnes Bester, sê spontaan: “My kind, jy lyk asemrowend!”
Onder die gaste is talle bekende gesigte. Die akteurspaartjie Zetske van Pletzen en Altus Theart, albei van Getroud met Rugby, Christel van den Bergh, ook van Getroud met Rugby, die aktrises Ciske Kruger en Odelle de Wet en die glanspaartjie Nadia Valvekens en Ivan Zimmermann gesels lekker met mekaar.
Ná die fotonemery stap die bruidspaar die onthaalsaal onder groot toejuiging binne op maat van Elvis Presley se Can’t Help Falling in Love. Die saal is elegant versier in ’n tema van roosgoud, glas en proteas. Die gaste lê weg aan ’n voorgereg van beesvleis-en-vyeslaai met bloukaassous voor Anelle se jare lange vriend Alwyn van Jaarsveld die heildronke instel. Hy laat die gehoor ’n paar
krete oefen om “die gees” vir die verrigtinge aan die gang te kry.
Stefan se skoolvriend Simon laat die bruidegom en gaste bloos toe hy vertel van die twee se manewales tydens hul grootwordjare. Hoe die twee op 12-jarige ouderdom ’n Penthouse-tydskrif gekoop en na die kaal vroue gekoekeloer het tot sy ma, Susan, hulle betrap het. “Daarna het oom Paul die tydskrif gekonfiskeer,” sê hy oor Stefan se pa, en die gaste skaterlag.
Toe Stefan die bedankings doen, glimlag hy besonder breed elke keer wanneer hy na Anelle as “my vrou” verwys.
Daarna staan die gaste nader aan die opskeptafels om te kies en keur uit die buffet van Thaise hoenderkerrie, beesbredie, pampoenkoekies, geelrys en ’n verskeidenheid groente. Die feesmaal word afgesluit met melktert, ’n sjokoladenagereg en troukoek.
Die indrukwekkende drielaagkoek is met gevulde sjokoladeballe versier. Die onderste laag is ’n Nutella-koek met donkersjokoladeballe, die middelste laag ’n pistachiokoek met melksjokoladeballe en die boonste ’n kaaskoek met witsjokoladeballe.
Die bruidspaar sukkel eers om die enorme koek te sny en giggel toe van die sjokoladeballetjies oor die vloer rol, maar eindelik kom hulle reg en gee mekaar ’n hap troukoek.
Stefan verras almal met sy aankondiging hulle gaan nie op hul gekose liedjie, The Seekers se I’ll Never Find Another You, die dansbaan open nie. “Anelle het al gevra hoekom ek nog nooit vir haar ’n liedjie geskryf het nie. Nou het ek,” sê hy.
En die twee gly oor die vloer op die maat van Gestuur van Bo, die lied wat hy spesiaal vir haar geskryf en opgeneem het: Jy is gestuur van bo. Jy laat my weer in liefde glo. Jy is die vuur hier binne my. Anelle en haar pa, Paul, dans op die maat van The Temptations se klassieke My Girl voor die gaste ook inval.
Toe die bruid met gaste staan en gesels, soen Stefan haar op haar skouer in die verbygaan. Die vreugde op sy gesig is onverbloem, so ook die ongeloof dat hierdie dag eindelik aangebreek en goed afgeloop het.
Enkele dae voor die troue het hy nog aan Huisgenoot gesê: “God het haar vir my geleen. Ek het nog nooit ’n vrou soos sy ontmoet nie. Sy’s die een.”
ANELLE en Stefan het mekaar in 2012 op die stel van die sepie Binnelanders ontmoet. Stefan, of dr. Gustav Kemp soos kykers hom geken het, het tussen tonele met Anelle, wat Tineke Mostert gespeel het, geselsies aangeknoop.
“Ek kan onthou ek het lekker met haar gesels en sy was baie spontaan,” vertel Stefan, die introvert in dié verhouding, kort voor die troue.
“Kyk na hom; ek het gedink hy’s vrek hot,” sê Anelle in die onderhoud terwyl sy aan sy wang vat en hy verleë glimlag.
Min het Anelle geweet hul paaie sou jare later weer kruis. Sy het woonplek in Johannesburg gesoek en het hom gebel om navraag te doen oor sy tuinwoonstel. Dit was reeds verhuur, maar aangesien dit kort voor die Gautengse première in Februarie 2016 van haar fliek Sonskyn Beperk was, het sy besluit om
die “hotste ou in Suid-Afrika” saam te vra na die bekendstelling van die fliek, waarin sy die vroulike hoofrol vertolk.
Sy erken sy moes al haar moed bymekaarskraap om hom te bel. “Ek was baie op my senuwees. Ek het nie eens geweet of hy sou onthou wie ek is nie.”
Stefan het haar alte goed onthou en sê nou: “En die res is geskiedenis.”
Byna twee jaar nadat Anelle die eerste, dapper skuif gemaak het, het Stefan haar op Oujaarsaand verlede jaar in sy geboorteland, Namibië, die jawoord gevra.
Die paartjie woon sedert Augustus verlede jaar saam. Hy moes toe al haar pa se toestemming vra, want hulle is albei tradisioneel en baie familievas.
Tog was Anelle skoon uit die veld geslaan toe hy haar vra om te trou. “Ons was by ’n groot spitbraai op Langstrand ( by Walvisbaai) saam met nog so 30 gaste. Ek het nogal gewonder hoekom mense hom vra of hy op sy senuwees is toe ons daar aankom,” sê sy.
“My familie kan nie ’n geheim hou nie,” bieg Stefan kopskuddend.
“Ek dink dit maak dit nog spesialer dat ek niks verwag het nie,” sê Anelle.
Kort voor middernag daardie aand het hy haar nader geroep. “Hy sê so ewe: ‘Kom staan by my. Ek het jou lief.’ Ek dog hy gaan nou ’n grap maak, toe sien ek hy kniel. Toe besef ek dis nou dit.”
Stefan sê die jawoord vra het hom nie op sy senuwees gehad nie; dit was eerder die logistiek. “Die ring was in die huis en sy wou net saamloop. Maar ek moes keer dat die honde by die hek uitkom en sy die ring sien. Dit het my laat stres.”
Anelle onthou sy het sonder aarseling ja gesê. En as dié paartjie eers ’n besluit geneem het, voeg hulle die daad by die woord. Binne minder as vier maande ná hul verlowing trou? Geen probleem. “Ons wou so gou moontlik trou,” sê Stefan. “Ek het alles beplan en gereël. Ek hou van organiseer,” sê Anelle. Hul wittebrood was met die verlowing ook klaar gereël, vertel sy met ’n breë glimlag. “Ons het toe reeds ’n Griekse vakansie saam met Stefan se ouers beplan. Dis nou sommer ons wittebrood.” Is dit nie vreemd om saam met jou ouers op wittebrood te gaan nie? “Nee wat, ons hou van hulle,” sê Stefan. “Ons is baie geheg aan ons families.” En Anelle knik instemmend. Stefan sê hulle baklei min. “Wanneer ons wel vassit, is dit vinnig verby. Ons koester nie ’n wrok nie.” “Ek dink ons is net vir mekaar bedoel,” sê Anelle. “Ek het beslis iemand soos Stefan gesoek. “Hy’s ’n introvert met baie ambisie en hy is baie wys. Hy laat my lag.” Die paartjie se toekomsplanne sluit kinders in. “Twee. Ons wil twee hê en sommer gou ook,” sê Anelle. Hulle hoop om hul glansryke lewe in die Goudstad agter te laat en Namibië toe te trek sodat hulle hul kinders daar kan grootmaak. Stefan sal sy musiekloopbaan daar kan voortsit, en hulle droom van ’n plaas. Maar eers geniet hulle daardie Griekse strand. En wie weet, dalk kom ’n wittebroodsbaba vir die Ludiks.
DIE BRUIDSPAAR BEDANK: SIMON RADEMAN (TROUROK) STYLE @SIMONRADEMAN.CO.ZA; MONTE DE DIOS (TROUPLEK) SALES@MONTEDEDIOS.CO.ZA; BAKER BOYS (TROUKOEK) INFO@BAKER-BOYS.CO.ZA; IMPECCABLE CREATIONS (BLOMME EN DEKOR) KARISA@IMPECCABLECREATIONS.CO.ZA; THEOLA BOOYENS (GRIMERING VIR BRUID & GEVOLG) THEOLABOOYENS @GMAIL.COM; GARY ROM (HARE VIR BRUID & GEVOLG) GARY@GARYROM.CO.ZA; DUNE KAHLAU (FOTO’S) DUNE@ DUNEKAHLAUPHOTOGRAPHY.COM; McCREA MEDIA (VIDEOGRAFIE) INFO@MCCREAMEDIA.CO.ZA; RAKA (ROOI- EN WITWYN) JORIKA@RAKAWINE.CO.ZA; HAUTE CABRIERE (SJAMPANJE) LIENTJIEM@CABRIERE.CO.ZA; PHD GREENSIDE (VELSORG VIR BRUID) INFO@PHDSKINRETREAT.CO.ZA; BENNIE DE BEER (PROFECTION SWITCHBOARDS) 012-804-5543; LEGACY LIFESTYLE (SPADAG-BEDERF) MSIBISI@LEGACYLIFESTYLE.CO.ZA