Slimfoon dalk oorsaak van jou skete
As jy baie tyd op jou slimfoon bestee, kan dit verskillende dele van jou liggaam knou. Hier’s maniere waarop jy kan keer dat jou toestel vir jou ’n las word
JY HET moontlik nog nooit van “slimfoonduim” of “tekshand” gehoor nie, want dit word nie amptelik as mediese toestande erken nie. Maar as jy op jou slimfoon boer, is dit dalk die oorsaak van daardie pyne wat jy ervaar. Ál meer mense word vir foonverwante skete en kwale behandel omdat hulle gedurig boodskappe tik, met dieselfde handbeweging oor die skerm vee of na die skerm staar, sê dokters en fisioterapeute. En hoe erger jou slimfoonverslawing, hoe groter die stremming op jou liggaam.
Wat is die algemeenste skermskete waarmee fisioterapeute en dokters deesdae te doen kry? En wat kan jy doen om die eise aan jou liggaam te verlig?
Sit gou jou foon neer en lees eers hier.
SEER OË
Deesdae raak rekenaarvisiesindroom (droë, seer en jeukerige oë) nie net mense wat heeldag voor ’n rekenaar werk nie. Skerms het so ’n groot deel van ons lewe geword dat jy waarskynlik ’n paar uur per dag na een kyk.
Gelukkig is daar nog geen bewyse dat lang sessies voor die skerm jou sig- of ooggesondheid op lang termyn beïnvloed nie, sê dr. Joshua Dunaief, ’n professor in oogheelkunde aan die Universiteit van Pennsilvanië. Dis eerder korttermynsimptome (hoof- en oogpyn en droë oë) wat die probleem is.
Navorsing toon baie mense ly aan fisieke ongemak nadat hulle so min as twee uur na ’n digitale toestel gestaar het. En volgens die oogkundetydskrif Optometry Times bestee tot 28% van die wêreldbevolking sowat 10 uur per dag voor ’n digitale skerm.
As jy op ’n rekenaar werk, kyk jy waarskynlik ’n paar uur ononderbroke na ’n skerm sonder om jou oë gereeld en genoeg te knip.
Dit veroorsaak wasige visie, hoofpyn en algemene oogstremming. “Dit is veral die geval as jy in die eerste plek onbehandelde sigprobleme het,” sê Nicole Levy, ’n oogkundige van Johannesburg.