Local Is Lekker
Dit is die aand waarop die uitblinkers van die Afrikaanse musiekbedryf hul besige program opsyskuif om vir hul harde werk en talent beloon te word. En soos gewoonlik was hulle in hul blinkste partytjieklere uitgedos vir vanjaar se Ghoemaprysaand, wat op 29 April in Emperors Palace, Kempton Park, gehou is.
“Met ’n vierjarige tweeling (Eliah en Daniël) en ’n sewe maande oue baba (Elah) in die huis, neem dit deesdae heelwat langer om reg te maak,” het die sangeres Karlien van Jaarsveld gebieg. “Maar dis tog so lekker om ’n bietjie uit te kom.”
Sy is deur haar man, Joe Breytenbach, vergesel en het in ’n skepping deur Anél Botha geskitter. Karlien het die Ghoema vir beste popalbum en vir die gewildste sangeres gewen.
Maar dit was Jo Black wat skoonskip gemaak het met sy album, Skepe. Hy het sewe Ghoemas huis toe geneem: vir beste verkoper, beste nuweling, beste album, beste digitale album, gewildste liedjie, beste digitale liedjie en gewildste sanger. Alles vir Skepe.
Ook Kurt Darren se vrou, Dunay, was asemrowend in haar Anél Botha-skepping.
Dunay sê dis haar eerste Ghoema-aand in drie jaar. “Met die vorige prysaande was ek óf swanger óf het ek pas ’n baba gehad.” Hulle het ’n dogter, Kyrah (3), en seun, Kade (1).
Die countrysanger Manie Jackson het aanhangers verras toe hy saam met sy eksverloofde, die sangeres Angel de Lange, opdaag. Die twee het in Maart hul verlowing verbreek, maar op hul Facebook-blaaie geskryf hulle is steeds vriende.
Die musiekpromotor Lydia Winchester het ’n ereprys vir haar lewensbydrae tot die musiekbedryf ontvang.
Van die ander groot wenners was Kurt en Jay du Plessis, gesamentlik vir beste popalbum deur ’n man.
Steve Hofmeyr het die prys vir beste kontemporêre album deur ’n man gewen en was die publiek se gunstelingsanger.
Juanita du Plessis is as die beste sangeres aangewys.