DIE WATERSIKLUS
Waar kom reën vandaan en waarheen gaan dit? Om te verstaan hoe die water tussen die aarde, die oseane en die lug beweeg, moet ons die waterkringloop volg
SOWAT 70% van die aarde is met water bedek, maar dit bly nie op een plek nie; water word gedurig oor die planeet heen versprei.
Alle water beweeg in ’n reusekringloop wat ons die watersiklus noem. Dit bestaan uit verdamping, kondensasie, neerslag en afloop.
Die watersiklus herversprei nie net water op die aarde nie; dit absorbeer en versprei ook son-energie tussen verskillende gebiede.
WAT BETEKEN DIT?
VERDAMPING Dit is wanneer die son water in riviere, damme en die see verhit en in waterdamp of stoom verander. Die waterdamp beweeg uit die watermassa in die lug op.
NEERSLAG So baie water het gekondenseer dat die lug dit nie meer bo kan hou nie. Die wolke raak swaar en die water val weer op die aarde in die vorm van reën, hael of sneeu.
AFLOOP Wanneer water as neerslag terugval aarde toe, kan dit in die oseane, mere, damme, riviere of op land val. Op land sal dit óf in die grond insyfer óf oor die land vloei en afloop in riviere, mere, damme of die see sodat die kringloop van voor af kan begin.
VERVOER Vervoer verwys na die beweging van water deur die atmosfeer, spesifiek van oor die oseane na oor die land. Party van die aarde se vogvervoer is as wolke sigbaar.
AFSETTING Waterdamp verander direk in ys soos sneeuvlokkies en ryp.
INFILTRASIE Infiltrasie is die proses waardeur neerslag of water ondergronds inweek en deur krake en openings tot in rots beweeg.
TRANSPIRASIE Transpirasie is die proses waardeur vog deur plante gedra word van die wortels na klein porieë aan die onderkant van die blare, waar dit in damp verander en in die atmosfeer vrygestel word.
DEURSYPELING Dit verwys na wanneer water deur die piepklein ruimtes tussen rotse en grondpartikels afwaarts beweeg.
KONDENSASIE Waterdamp in die lug koel af en vorm van ’n gas terug in ’n vloeistofvorm om wolke te vorm. KYK HOE WERK KONDENSASIE Gooi op ’n warm dag koue water in ’n glas. Waterdruppels vorm aan die buitekant van die glas. Die water het nie deur die glas gelek nie, maar kom uit die lug. Die waterdamp in die warm lug verander terug in ’n vloeistof wanneer dit met die koue glas in aanraking kom.