Sportiewe huwelik hou Vanes-Mari fiks
Die TV-dansster Vanes-Mari speel vir die Proteas netbal, haar man help die Bokke afrig, en saam het hulle ’n droomhuwelik
HULLE is op hul gelukkigste hier met die reuk van die see in die lug en die branders wat teen die rotse slaan.
Dis hul liefde vir die see wat gemaak het dat dié pasgetroudes hier in Big Bay naby Kaapstad net ’n klipgooi van die strand af kom nesskop het. “Ons hele leefstyl wentel om die see,” sê die oudrugbyspeler Matthew (Matt) Proudfoot, nou die Springbokafrigter, Rassie Erasmus, se assistent vir die voorry.
Maar dis sy vrou, Vanes-Mari (28), wie se naam deesdae op baie mense se lippe is. Dié lang, lenige Protea-netbalspeler het tot onlangs weekliks in ons harte ingedans in die M-Net-reeks Dancing with the Stars. Sy het boonop onder die topvier geëindig, en wie kan dáái video vergeet wat soos ’n veldbrand aanlyn versprei het? Nadat sy regstreeks op televisie laat glip het sy het ’n hele week “spuitpoep” gehad terwyl sy die foxtrot moes leer, het Vanes-Mari sowaar self die video op Instagram gedeel.
“Ek het dit nie regtig gehad nie,” vertel sy laggend.
“Sy hou daarvan om met haarself te spot om ander te laat lag,” sê Matt met ’n glimlag. “Ek was glad nie verbaas toe sy dit op regstreekse televisie sê nie. Ek het net gesê: ‘Daai is my vrou.’ Sy is wie sy is, sonder pretensie.”
Vandag is een van die min dae waarop die twee saam in hul knus ingerigte dubbelverdiepinghuis kan uitspan.
Hul werkprogramme is dol verby. Met ons besoek het Vanes-Mari pas die vorige aand uit Johannesburg teruggekeer nadat sy drie maande daar aan Dancing with the Stars geskiet het. Maar daar was nog nie tyd vir ontspan of gesels nie, want Matt was druk besig met administratiewe sake.
“Ons is so besig ons moet ons fone se kalenders sinchroniseer om te sien wanneer ons tyd saam kan deurbring,” sê Matt (45), wat 1,89 m in sy sokkies staan en al vir Skotland en die Blou Bulle uitgedraf het. Hulle moes selfs drie keer hul troue uitstel nadat hulle in Junie 2016 op ’n gehuurde boot op die see by Hermanus verloof geraak het – en dit omdat hul werk hulle te besig hou. “Ons kon net nie ’n datum kry wat ons albei se kalender pas nie. Ek het al begin dink die troue sou nie gebeur nie,” sê Vanes-Mari, ’n Pretorianer wat al vir die Protea-netbalspan speel vandat sy 16 is.
Op 21 Desember verlede jaar het die groot dag eindelik aangebreek, natuurlik by die see, toe Vanes-Mari en haar Matt op die strand by Paternoster aan die Weskus trou aan mekaar beloof het. “Die Here wou hê ons moes daar trou,” sê die borrelende blondine.
Sy en Matt, wat in Klerksdorp gebore is, se paaie het die eerste keer in 2013 op Stellenbosch gekruis – en dit deur Vanes-Mari se geliefde sport, netbal.
Matt, wat voorheen getroud was, het toe nog in Durbanville in die noordelike voorstede van Kaapstad gewoon, en Vanes-Mari was ’n honneursstudent in bedryfsielkunde by Maties. “Sy het my
dogter, Kristin (13), in netbal afgerig en ek was baie beïndruk met die manier waarop sy dit doen,” sê Matt.
Tog wil party mense hulle nie gelukkig sien nie, vertel die paartjie. “Dis oor ons ouderdomsverskil (van 17 jaar) en omdat ek voorheen getroud was en ’n kind het,” sê Matt.
“Maar dit pla ons glad nie,” laat Vanes-Mari hoor. ’n Glimlag versprei oor haar gesig. “Ons is dolgelukkig. En wat die Here bymekaargebring het, gaan niemand kan opbreek nie . . .”
WANNEER hulle wel tyd saam kan afknyp, is hulle op die strand. “Ons roei, vang vis . . .” sê Matt.
“By die see voel ek nader aan die Here,” sê Vanes-Mari terwyl ons in hul spoggerige viertrekvoertuig na hul gunstelingrestaurant, Café Blouberg in Bloubergstrand, ry.
Matt noem sedert 2008 Kaapstad sy tuiste. Hy het destyds van die noorde af hierheen verhuis om die Stormersrugbyspan te help afrig.
Hulle glo hul huwelik werk omdat albei se loopbaan in die sportwêreld is; hy help om die Bokke af te rig, en sy speel en rig netbal af en hou haar lyf kommentator op SuperSport.
“In ons beroepe is daar ongelooflik baie druk wanneer jy verloor. Mense behandel jou anders ná ’n nederlaag,” sê Matt waar ons in die restaurant sit.
“Maar ons albei verstaan wat dit verg om op ’n intensiewe vlak mee te ding. Ons verstaan die ure wat dit vereis, en ons gun mekaar die geluk en sukses,” sê Vanes-Mari.
“Ons ondersteun mekaar om ons onderskeie doelwitte te bereik,” sê Matt. “Sy is ’n groot Springbokondersteuner. Sy motiveer en help my deur daardie moeilike tye.”
Hy was weer haar grootste ondersteuner toe sy deeltydse netbalafrigting prysgegee het om aan Dancing with the Stars deel te neem.
Matt het altyd haar afrigstyl bewonder. “Veral hoe sy die spelers respekteer. Dit het my gewys hoe om die Bokke te behandel. Ek pas haar afrigstyl in my rugbyomgewing toe. Sy vul my nie net emosioneel en sielkundig aan nie, maar ook op sportvlak.”
“Ons is mekaar se afrigters, pastore, vriende en liefde,” beaam Vanes-Mari.
Die twee het mekaar selfs gemotiveer om gesonder te leef en gewig te verloor.
“Toe ek Matt ontmoet, was hy ’n bietjie onfiks en was dit ’n slegte tyd in sy lewe. Maar ons het gereeld saam gaan oefen en hy het die afgelope jaar sowat 22 kg verloor. Hy is nou ’n baie beter weergawe van homself.”
Vanes-Mari het 13 kg afgeskud in die drie maande waarin sy aan die dansprogram deelgeneem het. “Dit was nie doelbewus nie. Ek het die gewig verloor danksy die dansery en die lang ure se oefen. Ek het nie eens geweet ek verloor gewig tot Matt vir my in Johannesburg kom kuier en gesê het ek het gewig verloor nie.”
Terwyl sy in Johannesburg was, het Matt af en toe oor ’n naweek kom kuier. Wanneer hy nie in die gehoor was nie, was hy voor die kassie vasgenael om haar in aksie te sien op die dansbaan.
“Gelukkig is ons daaraan gewoond dat ons albei baie reis vanweë ons sportrooster s. Die tyd wat ons wel saam deurbring, is gehaltetyd en ons waardeer mekaar,” sê Vanes-Mari, wat vandees- maand vir die Noordwes-netbalspan begin speel het. Sy wil volgende jaar aan die Wêreldbekernetbaltoernooi in Liverpool, Engeland, deelneem.
Matt ken nes Vanes-Mari kritiek. “Soms kom daar baie kritiek as jy ’n afrigter vir die Springbokspan is. Dan is Vanes-Mari daar om dié geraas uit te skakel. Sy help my om weer op die positiewe te fokus.”
Daar heers op die oomblik ’n goeie gees in die Bokspan, en Matt se verhouding met Rassie is goed, sê hy. “Maar ek dink sodra ons wedstryde begin wen, gaan die gees in die span nog beter wees. Dit is ons doel om die span volgende jaar na die Wêreldbeker-eindronde te vat.”
Maar eers lê die toets teen Wallis op 2 Junie in Amerika voor.
“Rassie is slim en ’n goeie afrigter wat die tegniese vaardighede van die spelers wil verbeter. Hy verwag hoë standaarde van jou, en om sy assistent te wees is vir my ’n groot droom wat vervul is,” sê hy. “Die span behoort aan die land; dis belangrik dat ons presteer.”
En daardie gerugte van aftrede? “Glad nie. Ek het ’n werk om te doen en is die beste mens daarvoor,” hou hy vol.
Vanes-Mari is op haar beurt trots op haar dansprestasie. “Veral vir ’ n wit meisie wat geen ritme gehad het nie en ’n man wat nie kan dans nie. Met ons eerste dans op ons troue het hy op my trourok getrap en dit geskeur,” vertel sy.
Hulle het groot planne vir die toekoms. “Ons wil in 2019 aan ons onderskeie Wêreldbekertoernooie deelneem en in 2020 met ’n gesin begin,” sê Vanes-Mari.
Maar vir eers is dié sportmal paartjie daarmee tevrede dat dit net hulle twee is, en sy laat hoor: “Ek was nog nooit so gelukkig nie.”
‘Ons albei verstaan wat dit verg om op ’n intensiewe vlak mee te ding’