Hykie vier sy 40ste
Die Binnelanders-akteur Hykie Berg het sy 40ste 40s verjaardag op 2 Mei behoorlik gevier met m ’n karnaval partytjie met ’n neonkleurskema. Dit is in die Kai Thai-oord by die Wieg van die Mensdom gehou wat behoort aan sy peetpa, Ron Hutchinson. Dit was ook ’n viering van die lewe van Hykie se beste vriend, Ron, se seun, Ihan, wat 10 jaar gelede oorlede is. “Hy sou binnekort ook 40 geword het,” sê Hykie.
Onder die gaste was die akteurs Pascal Pienaar, Ramey Short en Pietie Beyers. “My suster, Magrikie, het van die Kaap af gekom en my ma, Pauli Berg (van Pretoria), was ook daar. Almal het kostuums aangetrek, ons het gekuier, geswem, Thai-kos geniet en die aand om ’n groot vuur sit en braai.”
Hykie se mentor, Wouter Snyman, ’n skrywer en uitvoerende hoof van ’n finansiële groep, sy Binnelanders-medeakteur Reynardt Hugo (dr. Tertius Jonker) en ’n goeie vriend, Riaan Neveling, het toesprake gelewer.
Hykie en sy vrou, Melissa, het ook hul huweliksherdenking gevier; hulle was die vorige dag vyf jaar getroud. Hulle wil oor twee jaar met ’n gesin begin.
“Ek is glad nie gepla dat ek 40 getref het nie,” sê Hykie, wie se outobiografie, Hykie Berg: My Storie van Hoop, verlede jaar verskyn het. “Ek sê al my lewe lank dat ek 121 jaar oud gaan word. My beste jare kom nog.”