ST. GEORGE-KAPEL

Omdat Harry en Meghan graag ’n intieme troue wou hê, het hulle dié kapel op die terrein van die Windsorkasteel vir hul huwelikseremonie gekies. In teenstelling met die Westminster-abdy in Londen, wat plek het vir 2 000 mense en waar ouboet William en Kate in 2011 getroud is, kan hier net 800 mense inpas.

Verskeie koninklike troues is al in die St. George-kapel gehou. Die eerste was in 1863 toe koning Edward VII en koningin Alexandra afgehaak het. Meer onlangs, in 2008, is Peter Phillips, die seun van Harry se tannie prinses Anne, hier met sy Kanadese meisie, Autumn Kelly, getroud.

Dit is ook die plek waar ’n kerklike bevestigingseremonie tussen Harry se pa, prins Charles, ens y tweede vrou, Camilla Parke r Bowle s, gehou is ná hul burgerlike huweliksplegtigheid in 2005 by Windsor Guildhall.

Op 12 Oktober vanjaar trou nog ’n jong koninklike hier wanneer Harry se niggie prinses Eugenie (28) met die wynhandelaar Jack Brooksbank (32) afhaak.

Nie minder nie as 10 konings lê in die kapel begrawe.

Hulle is onder andere Harry se grootjies, koning George VI en die koninginmoeder, sowel as prinses Margaret, sy ouma se suster.

Dit sal vermoedelik ook die laaste rusplek van koningin Elizabeth II wees.