DIE HERTOG EN HERTOGIN VAN CAMBRIDGE

William, Kate en hul kroos, prins George (4), prinses Charlotte (3) en die sewe weke oue prins Louis, woon in woonstel 1A. Prinses Margaret, koningin Elizabeth se jonger suster, het eens hier gewoon en dit destyds “die pophuis” genoem – nie dat dit piepklein is nie. Dit is trouens die grootste van al die blyplekke in die Kensingtonpaleis en spog met vier verdiepings, twee kombuise, ses slaapkamers en ’n motorhuis met plek vir agt voertuie.

Ná William en Kate se troue in 2011 is die woonstel teen sowat R75 miljoen opgeknap met onder meer WiFi-internettoegang en lugversorgers. Die koninklike paartjie het eers die meeste van hul tyd in hul plattelandse tuiste, Anmer Hall in Norfolk, deurgebring, maar die Kensingtonpaleis is sedert verlede jaar hul permanente tuiste.