DIE HERTOG EN HERTOGIN VAN SUSSEX
Prins Harry het voor sy troue in die knus Nottinghamkothuis op dieselfde perseel as die Kensingtonpaleis gewoon. Dit is ook waar hy Meghan die jawoord gevra het. Die pasgetroudes gaan glo binnekort die tweeslaapkamerkothuis, ’n nederige blyplekkie volgens koninklike standaarde, vir ’n veel groter tuiste verruil en langs William en dié se gesin intrek. William en Kate het ook vroeër in die kothuis gewoon.
Woonstel 1, waar Harry en Meghan nou gaan nesskop, is in die tweede grootste vleuel van die paleis en spog met 21 vertrekke. Volgens die Britse koerant The Daily Mail het opknappingswerk aan die woonstel al verlede November begin, nog voor Harry en Meghan se verlowing aangekondig is.