Jou pad met jou kinders ná ’n affair
Jason Rohde was verpletter toe sy een dogter van sy egbreuk uitvind. Hoe herstel ’n ontroue ouer die verhouding met sy kroos?
NOG voor die sakeman Jason Rohde se buiteegtelike verhouding met ’n kollega die hoofopskrifte sou haal en tydens sy verhoor in die hof bespreek sou word, het een van sy drie dogters van sy ontrouheid uitgevind. Die tiener het die skokontdekking gemaak toe sy op haar ma, Susan, se selfoon op ’n brief afkom wat Jason se minnares, Jolene Alterskye, ’ n eiendomsagent van Kaapstad, aan hom gestuur het. Hy was toe nog die grootbaas van die eiendomsagentskap Sotheby’s. Susan het die e-pos van haar man se selfoon na haar eie foon aangestuur.
“Ek was verpletter omdat my dogter die boodskap gelees het,” het Jason onlangs onder kruisverhoor in die Wes-Kaapse hooggeregshof gesê waar hy op aanklagte van moord op sy vrou en regsverydeling teregstaan.
Jason hou vol sy vrou het haarself in die oggendure van 24 Julie 2016 met ’n haartangkoord agter die badkamerdeur van hul hotelkamer op die Spierwynlandgoed buite Stellenbosch opgehang. Die staat voer aan hy het die toneel gemanipuleer om dit te laat lyk asof Susan haar eie lewe geneem het.
Of dit selfdood of moord was, Jason het in die hof erken die ma van sy drie kinders sou vandag nog geleef het was dit nie vir sy “walglike optrede” wat Susan so hewig ontstel het nie.
Hy het in die hof getuig hy is skuldig aan oneerlikheid, maar nie aan moord nie en gesê hy sal vir die res van sy lewe met die spyt oor sy affair moet saamleef. “Ek dien reeds ’n lewenslange vonnis uit. Ek kan nooit die skande en skaamte oorleef nie. En ek moet my kinders in die oë kyk met die wete dat ek hul ma gedryf het om haar eie lewe te neem.”
Toe hul tienerdogter van sy affair uitvind, het hy dit vermy om met haar daaroor te praat. “Susan het aan haar verduidelik ons het probleme, maar het gesê ons werk daaraan,” het hy gesê.
Wanneer ’n affair aan die lig kom, lei dit nie net tot ’n vertrouensbreuk tussen die paar nie; ook hul kinders ervaar trauma en ’n verlies aan vertroue in die ouer wat die affair gehad het. Dit kan die gesinsdinamika skud en bande verbreek.
Of die ouers nou soos die Rohdes hul huwelik probeer red of besluit om te skei, ’n moeilike pad lê vir die ontroue ouer voor om die verhouding met hul kinders te herstel. Hoe gaan ’n ouer te werk om die vertrouensbreuk te heel en bande met die kinders te herbou?
Elke gesin se omstandighede verskil en almal het unieke uitdagings. Huisgenoot het by kenners gaan aanklop om raad oor ’n wegspringplek te vra.
My affair het op die lappe gekom. Wat sê ek vir my kind?
Oop en eerlike kommunikasie met tieners of volwasse kinders is die beste uitweg, sê Franco Visser, ’n kliniese sielkundige van Brakpan. “Dit is altyd beter om verantwoordelikheid te aanvaar en te erken jou optrede was verkeerd,” sê hy.
Hy sê ’n mens moenie verskonings soek of die blaam probeer verplaas nie. “Moenie jou gedrag probeer regverdig en jou verhoudingsprobleme met die ander ouer met jou kind bespreek nie.”
Dis belangrik om nie die impak op jou kinders te onderskat nie en te begryp jou gedrag raak hulle. “Moenie die houding aanneem van: Ag, dit is niks. Dit was of is nie so erg of ernstig nie,” sê Franco.
Beantwoord jou kinders se vrae met inligting wat toepaslik is vir hul ouderdom, maar “moenie intieme besonder-
hede deel nie,” sê dr. Rosa Bredenkamp, ’n sielkundige van Stellenbosch.
Met jonger kinders wat onbewus is van ’n derde party, is dit die beste om daaroor te swyg, sê Corné Peach, ’n kliniese sielkundige van Kempton Park. Wanneer die ouers besluit om te skei, moet hulle vir so ’n jong kind verduidelik hulle gaan uitmekaar. “Die redes maak nie vir jong kinders saak nie. Pa en ma moet verduidelik wat hul planne is en hoe die veranderings die kinders gaan raak,” sê sy.
Wanneer ’n jong kind wel bewus is van ’n derde party, moet ouers hul vrae daaroor beantwoord, maar dit eenvoudig hou. “Besonderhede waarvoor die kind nie vra nie, is onnodig,” sê Corné.
Hoe help ek my kinders hul emosies verwerk?
’n Ouer wat ontrou was, moet sy of haar kinders tyd en ruimte gee om gevoelens soos woede, teleurstelling en onsekerheid te verwerk. “Jou kind gaan vrae en onsekerhede hê en hulle gaan jou wantrou,” sê Franco.
Jy moet bereid wees om vir hulle die ruimte vir gesprek te skep om hul vrae te beantwoord en na hulle te luister. Hy sê dit kan lank duur vir kinders om die gevoelens te verwerk en dat ’n eenmalige of oppervlakkige gesprek daaroor nie noodwendig voldoende sal wees nie.
Jonger kinders wat nog nie oor die woordeskat beskik om hul emosies te verwoord nie, kan daaraan uiting gee deur saam met jou prente te teken of stories te vertel. Jy moet bereid wees om die ruimte en tyd hiervoor te skep. Neem die kind na ’n terapeut wat spelterapie sal inspan om jou te help verstaan wat in die kind se leefwêreld aangaan, sê Corné.
Die pad vorentoe
As die ouers besluit om hul huwelik te probeer red, moet hulle verkieslik saam am met die kinders daaroor gesels. “Verduidelik julle e wil deur jul verskille werk, sê julle is nog lief vir mekaar, julle het vergewe en wil die gesin bymekaar - hou,” sê Rosa.
Wanneer die ouers gaan skei, moet hulle die kinders daarvan vertel sonder om mekaar daarvoor te blameer. Verseker hulle van jou liefde. “Kinders kan dikwels voel as jy my ma of pa kan verlaat, kan jy dieselfde met my doen,” sê Rosa.
“Maak tyd om oor jou kind se gevoelens te praat, vertroos hulle en vra wat jy kan doen om die situasie te verbeter.”
Sy sê dit is belangrik dat ouers daarna moeite doen om by hul beloftes te hou en konsekwent op te tree; dit help vertroue herstel. “Wanneer jy gesê het jy gaan jou kind sesuur oplaai, moet jy nie eers halfsewe opdaag nie.”
Hoe gemaak as die ouer die verhouding met die derde party wil voortsit?
“Ouers moet daarmee vrede maak dat die kind dalk nooit die derde party gaan aanvaar nie,” waarsku Corné. Rosa sê die ouer hoef nie onmiddellik vir die kinders te sê hulle moet die ander mens leer ken nie. “Om iets te probeer ryp druk lei net tot meer skade. Die kind moet nog skok, teleurstelling, hartseer en verlies verwerk. ’n Ouer kan nie van ’n kind verwag om net van die een gesinsituasie by ’n volgende in te spring nie.” As die kind die derde party later aanvaar, sal dit in hul eie tyd en teen hul eie pas wees.
Kan die verhouding met my kinders herstel word?
Dit hang van die omstandighede en die kind se verhouding met die ouer af, sê Rosa. “Een kind kan dalk met woede reageer, terwyl ’n ander meer empatie kan hê.” Ouderdom speel ’n belangrike rol hierby.
“’n Tiener wat self begin bewus word van die teenoorgestelde geslag, gaan waarskynlik negatiewer teenoor die ouer voel as ’n jonger kind.” Hoop bestaan wel en bande kan weer herbou en herstel word. “Dit duur soms jare, maar die meeste kinders ontwikkel mettertyd begrip oor waarom iets nie uitgewerk het nie,” sê Rosa.