Burgers vir pa om van te kies en keur
MEXIKAANSE BURGER
LEWER 8 BURGERS Bereiding: 40 min. Gaarmaak: 50-60 min. (rolletjies, vleiskoekies en sous) Rys-en-staan: 40 min. (brood en piekel) MIELIEBROODROLLETJIES 1 kg winkelbrooddeeg 1 blik (400 g) pitmielies, goed gedreineer 1 groen brandrissie, gekap koekmeel om in te rol VLEISKOEKIES 150 g uie, gekap 1 knoffelhuisie, fyngedruk 5 ml (1 t) elk fyn komyn, paprika en fyn koljander 2,5 ml (½ t) brandrissiepoeier 750 g beesmaalvleis 250 g varkmaalvleis of varkworsies se vleis 60 ml (¼ k) gekapte koljanderblare sout en peper TAMATIESOUS 1 x 410 g-blik kersietamaties 1 groen brandrissie, gekap 2 knoffelhuisies, fyngedruk ’n knippie brandrissie, komyn en koljander 10 ml (2 t) suiker sap van ½ suurlemoen 15 ml (1 e) droë origanum GUACAMOLE 2 avokado’s, fyngedruk halwe klein ui, fyngekap 15 ml (1 e) lemmetjiesap 1 gepiekelde jalapeñorissie, gekap PIEKEL 500 g mengsel van uieringe, radysskyfies en komkommer, in linte gesny 100 ml witwynasyn 30 ml (2 e) suiker 15 ml (1 e) sout AFRONDING botterslaaiblare, suurroom en mentblaartjies
Voorverhit die oond tot 190 ˚C. 1 Mieliebroodrolletjies Meng die deeg, pitmielies en brandrissie goed. Werk van die ekstra meel by die mengsel in as die deeg te slap is. Vorm 8 bolletjies, pak op ’n bakplaat wat goed met meel bestrooi is en laat sowat 20 min. rys. Bak 20-25 min. of tot dit gaar is en die broodjies hol klink wanneer jy daarop klop. Vleiskoekies Meng al die bestanddele liggies, maar goed en vorm 8 vleiskoekies. Braai in ’n verhitte riffelpan tot bruin aan albei kante. Sit op ’n bakplaat en bak sowat 7-10 min. tot gaar maar steeds effens pienk binne.
3 Tamatiesous Plaas al die bestanddele in ’n kastrolletjie en kook tot geurig en nie meer waterig nie, sowat 8 min. 4 Guacamole Meng al die bestanddele. 5 Piekel Pak die uie, radyse en komkommerlinte in ’n skoon glasfles. Meng die asyn, suiker en sout tot die suiker opgelos is en giet bo-oor. Laat sowat 20 min. staan.
6 Afronding Halveer ’n rolletjie en pak blaarslaai en ’n vleiskoekie bo-op. Skep van die tamatiesous bo-oor, gevolg deur die guacamole en piekel. Skep suurroom op en rond af met die ment en die bokant van die rolletjie.
7 Sit voor saam met eiervrugtjips.