Nuwe speletjies bewys enkelspelerervarings is terug met mening
Enkelspelerspeletjies is vir die laaste ruk op die agtergrond geskuif terwyl ontwikkelaars hulle op groot multispeler-ervarings toegespits het. Dié twee speletjies bevestig dit is nou die beste tyd om ’n enkelspeler te wees
GOD OF WAR PS4
Die God of War-franchise is een van die gewildste speletjiereekse in die geskiedenis van PlayStation. Die reeks het die kap-en-snygenre gedefinieer op die PS2 en PS3 met sy oordadige geweld, volwasse temas en die hoofkarakter, Kratos, wat ’n wraaksugtige moordtog onderneem deur die hele panteon van Griekse gode – sy pa, Zeus, inkluis.
Met dié dat daar min beweegruimte was wat karakter en storie betref en die kap-ensny-genre van God of War by die meeste spelers ongewild geraak het, was dit duidelik ’n opvolg sou iets spesiaals moes doen.
God of War vir die PS4 is nie ’n herskepping nie, al het dit dieselfde naam as die eerste speletjie in die reeks. Pleks daarvan speel dit langer as 10 jaar ná die gebeure van God of War 3 af. Kratos het Griekeland vir Skandinawië verruil, ’n vrou ontmoet en ’n seun gehad. Hy is nou ouer, moeër en ’n pa.
Die storie begin op ’n uiters sombere noot, want die seun se ma het pas gesterf en haar sterwenswens was dat haar as op die hoogste piek in die ryk gestrooi word. Dit lei tot ’n epiese reis waarin ’n seun ’n man sal word en ’n stryder ’n pa.
Die wêreld is amper onmoontlik goed verwerklik en grafies asemrowend. Die veranderings aan die gevegstelsel verleen ongekende diepte vir ’n God of War-speletjie. Die skryfwerk en storie is so goed geskep en afgemeet, dis amper onmoontlik om die speletjie neer te sit. Dit is gewis die beste speletjie wat nou vir die PS4 beskikbaar is.