STADIG GEROOSTERDE SPRINGBOKBLAD MET KOESKOES EN SOETWORTELS

GENOEG VIR 4-6 MENSE BEREIDING: 20 MIN. GAARMAAK: 3-4 UUR BLAD 1 springbokblad sout en peper 2 uie, in kwarte gesny 4 knoffelhuisies, gekneus 2 wortels, in stukke gesny 60 ml (¼ k) bessiekonfyt 500 ml (2 k) rooiwyn 500 ml (2 k) hoenderaftreksel KOESKOES 375 ml (1½ k) koeskoes 100 g droëperskes, in klein stukkies gesny 30 ml (2 e) sonneblomsade, gerooster 50 g amandels, grofgekap 5 ml (1 t) komynsaadjies, gerooster ’n hand vol vars koljanderblare, gekap SOETWORTELS 6 wortels, geskil en in lang repe gesny 30 ml (2 e) botter 15 ml (1 e) heuning 1 takkie roosmaryn Voorverhit die oond tot 160 °C.

1 Blad Geur die springbokblad oraloor met die sout en vars gemaalde peper. Pak die uie, knoffel en wortels op die bodem van ’n oondbak met ’n deksel. Sit die blad bo-op en verf die bessiekonfyt oor die vleis. Giet die rooiwyn en aftreksel in die bak en sit ’n vel tinfoelie booor die bak. Plaas die deksel dan stewig bo-op en rooster 3-4 uur in die oond of tot die vleis van die been begin afval. 2 Koeskoes Berei die koeskoes volgens die aanwysings op die verpakking. Vlok dit met ’n vurk en voeg die res van die bestanddele by. Roer goed deur en geur met die sout en peper na smaak. 3 Soetwortels Plaas al die bestanddele saam in ’n pan en roerbraai oor matige hitte tot gaar en stroperig. Geur met sout. 4 Vir voorsit Vlok die vleis uitmekaar met twee vurke en sit voor saam met die soetwortels en koeskoes.