Ou foto’s wys menslike koninklikes
Drie dekades se foto’s wat ’n ander sy vanan die Britse Br ritse adel wys, word nou opgeveil
DIE koninklike familie het onlangs bymekaargekom vir die vaandelparade toe koningin Elizabeth amptelik haar 92ste verjaardag vier.
Sy vier haar geboortedag elke jaar twee maal – eers op 21 April, die eintlike datum, en dan weer op die tweede Saterdag in Junie.
Wanneer die koningsgesin so op die balkon van die Buckinghampaleis saamkom, is dit soms moeilik om te glo hulle is ook maar mense.
Maar onlangs is ’n skatkis foto’s bekendgestel wat die ander kant van geslagte koninklikes wys. Agter die deftige mense wat altyd net hul beste voetjie in die openbaar voorsit, skuil toe sowaar platjies en wildewragtigs en gewone gesinne.
Die 4 000 foto’s het behoort aan wyle John Scott, die amptelike koninklike fotograaf wat drie dekades lank toegelaat is om die Windsors agter die skerms af te neem. Hy is al in 1986 oorlede en het die foto’s toe bemaak aan sy assistent, Judy Appelbee. Sy het onlangs besluit om dit te laat opveil.
John was ’n interessante karakter wat gebore is as Vassa Voynovich, ’n JoegoSlawiese aristokraat wat tydens die Tweede Wêreldoorlog uit Serwië na Engeland gevlug het. Die voormalige weermagkolonel het in Londen gewerk as die privaat sekretaris van koning Pieter II van Joego-Slawië voor hy fot fotograaf geword het. Hy het sy naam verengels om hom te help om makliker werk te kry.
John het die Britse koninklike familie ontmoet deur sir Jock Colville, die destydse prinses Elizabeth se privaat sekretaris. Nadat sy van sy foto’s gesien het, het sy gevra dat hy haar in haar uniform afneem tydens een van haar heel eerste vaandelparades – en so het hy binne-in die Britse koninklike binnekring beland.
Op die foto’s wat hy in die 1960’s, ’70’s en ’80’s van Brittanje se bekendste familie geneem het, sien ’n mens hulle soos nog nooit tevore nie. En nou, vir die eerste keer, kan die wêreld hulle ook sien soos hy hulle deur sy lens beleef het.