Bianca Blanc
KLIM VINNIG DIE MUSIEKLEER UIT Deur MYRON WEYERS
Dié 19-jarige sangeres en liedjieskrywer was nie net ’n prefek in haar matriekjaar nie; sy het ook haar eerste musiekkontrak onderteken en haar debuutliedjie, Butterflies, is ’n treffer!
BIANCA SE BUTTERFLIES, wat sy self geskryf het, is ’n groot gunsteling op radiostasies landwyd. Haar jongste liedjie, All My Life, is einde Junie uitgereik en haar debuutalbum sal vandeesmaand beskikbaar wees.
DIE SANGERES VAN CENTURION het al geopen vir talle plaaslike musikante, soos Jesse Clegg, Elvis Blue, Die Heuwels Fantasties en Wonderboom. “Dit was wonderlik. Mense verwonder hulle aan dié sangers en hulle was so nederig en superaangenaam en het my goeie raad gegee.”
DIE PLAASLIKE MUSIEKBEDRYF het haar baie goed ontvang. “Baie mense meen die musiekbedryf is ’n wrede wêreld, maar almal wat ek tot dusver ontmoet het, was supervriendelik en ondersteunend.”
BIANCA BESKRYF HAARSELF AS ’n gewone meisie. “Ek is eintlik nogal skaam, maar hou van mense en honde. Ek het baie sterk waardes. Ek is lojaal, betroubaar en beslis vergeetagtig. Mense sê ek is net die regte hoeveelheid vreemd.”
BUTTERFLIES LIES KLINK JOLIGen JOLIG en laat ’n mens se voete te jeuk, maar dit handel eintlik oor ’n liefdesteleurstelling wat Bianca ervaar het. “Hoewel die titel dit laat klink na ’n gelukkige liedjie, is dit eintlik ’n uitmaakliedjie.”
SY SKRYF HAAR EIE LIEDJIES. Bianca komponeer Afrikaanse en Engelse liedjies. “Ek probeer my gevoelens in my liedjies oordra.”
HANNAH MONTANA, die Disney-karakter wat die Amerikaanse sangeres Miley Cyrus destyds vertolk het, het ’n groot invloed op haar as jong meisie gehad. “Ek onthou nog hoe ek in die sitkamer met die hareborsel, wat ek as ’n mikrofoon gebruik het, vir my ouers gesing het. Maar sy het as kind ook na The Beatles, Pink Floyd, Wonderboom en selfs Bach geluister.
SY HET IN 2017 gematrikuleer en haar musiekloopbaan begin. “Ek leef my droom uit.”
IN 2019 wil sy vir ’n B.A. in onderwys begin studeer. “Ek wil spesialiseer in spesialebehoefteonderwys.” Maar vanjaar wil sy graag die land met haar nuwe album plattoer.