Skakel verwarmers af sodra dit ’n gerieflike temperatuur bereik
6 BESTE WENKE OM KRAGSUINIG TE WEES
Onthou, elke klein gedragsaanpassing help, soos om nie die ketel vir een koppie koffie te vul nie en al jou strykwerk op een slag te doen. Hier is nuttige wenke van onder meer die departement van energie, die Verenigde Nasies se Ontwikkelingsprogram, die Wêreldomgewingsfasiliteit en Earthlife Africa:
1
Geisers Dis die grootste kragvraat en verantwoordelik vir tot 40% van jou maandelikse kragrekening. Die sowat 5,4 miljoen geisers in Suid-Afrika gebruik saans tydens spitstyd genoeg krag om ’n groot stad soos Durban te bedien.
Koop die regte grootte geiser vir jou huishouding. Stel die termostaat af na 55 of 60 °C; die water sal warm genoeg wees en dit sal jou baie krag bespaar. Skakel jou waterverhitter af in spitsgebruiktye; dus tussen ses- en agtuur soggens en saans. ’n Tydskakelaar maak dit makliker.
As ’n 150 L-geiser se water tot by sy termo staatverstellingspunt verhit is wanneer dit afgeskakel word, daal die watertemperatuur binne 24 uur met net 10 °C.
Sonkragwarmwatertoestelle kan deesdae betreklik gou afbetaal word deur jou besparing aan krag en etlike jare daarna gebruik word. Party kan ook elektrisiteit gebruik ingeval dit lank bewolk is, of jy kan jou sonverhitte water in ’n elektriese geiser laat vloei vir nog verhitting.
2
Stowe Beperk oondverhitting vooraf sover moontlik. Buiten vir brood en ander gebak is dit meestal onnodig. Konveksieoonde kan gewoonlik kos teen ’n laer temperatuur en gouer gaarmaak.
Gebruik die mikrogolfoond en elektriese potte wanneer moontlik, pleks van die oond. Sulke kleiner toestelle verbruik tot die helfte minder elektrisiteit as oonde om dieselfde gereg te berei. Skakel die oond af 5-10 minute voor die aanbevole gaarmaaktyd verstryk en benut die vasgevangde hitte om die gaarmaakproses te voltooi. Net so kan jy krag bespaar deur elektriese stoofplate af te skakel wanneer iets amper gaar is.
Oorweeg gerus gas vir kookwerk. Baie mense beskou dit as energiedoeltreffender omdat jy fyner beheer oor gasplate het, wat onmiddellik verhit en nie tyd verg om af te koel nie.
Gebruik potte wat net groot genoeg is vir die hoeveelheid kos en die elektriese stoofplaat, hou die deksel op en week droë kos, soos peulgewasse, vooraf. 3 Wasmasjiene en tuimeldroërs Koop liewer ’n voorlaaier- as ’n bolaaierwasmasjien. Hulle gebruik gewoonlik minder water en krag. Sorg dat jy ’n volle vrag het voor jy was en droogmaak. Gebruik sover moontlik die kouewatersiklus en ’n wasgoedlyn of droograk om jou goed droog te kry.
As jou klere ná ’n wassiklus natter voel as wat dit behoort te wees, kan jy met nog ’n tolsiklus teen die hoogste spoed die oormaat vog uitwring. Maak handdoeke en swaar katoen afsonderlik droog; nie saam met ligter klere nie. Jou tuimeldroër sal doeltreffender werk as jy gereeld sy filter skoonmaak.
Probeer jou wasmasjien naby die geiser staanmaak – so hoef warm water nie ver deur pype te beweeg nie en gaan minder hitte verlore. Die insulasie van alle warmwaterpype maak ook sin.
4
Skottelgoedwassers Maak seker dis volgepak, maar nie oorlaai nie. Gebruik net ’n voldoende temperatuurverstelling – hoër temperatuurverstellings kom neer op groter energieverliese. Kies die geenhitte-droogmaaksiklus (soms air dry genoem). ’n Oornagdroogfunksie is nog beter; die masjien skakel outomaties af ná die spoelsiklus, wat die energiekoste van jou skottelgoedwasser met tot 10% kan verminder.
5
Ys- en vrieskaste Hulle moet dig sluit. Gaan die rubberseël na en maak dit skoon of vervang dit indien nodig. Maak seker jou yskas se verstelling is 3 tot 4 °C en jou vrieskas s’n -15 tot -18 °C.
Ontvries vrieskaste wanneer ys in hulle aanpak. Laat kos oornag in die yskas ontdooi; dit kan jou tydens bereiding heelwat krag bespaar. Maak dié twee toestelle so min moontlik oop en so gou moontlik weer toe. Moet hulle ook nie naby die stoof of in direkte sonlig staanmaak nie.
6
Verwarmers Maak deure en vensters toe wanneer jy ’n vertrek verhit en skakel verwarmers af sodra dit ’n gerieflike temperatuur bereik het of wanneer jy vars lug wil inlaat. Winterklere moet ook binnenshuis benut word.