Op die Rooitapyt

Dis somer in Engeland, en vir die koningsfamilie beteken dit dis tyd om te ontspan, aan sjampanje te teug en ’n paar weddenskappe by die Royal Ascot aan te gaan

ROJALE GESELSIES

Prinses Beatrice, haar ma, Sarah, die hertogin van York, en lady Carolyn Warren is saam met koningin Elizabeth II in die koninklike losie afgeneem voor hulle gekyk het hoe die koningin se perd Elector aan die Koning Edward VII-resies deelneem.

ELIZABETH SE MODEMONARGIE

Die koninklike reënboog! Koningin Elizabeth is bekend vir helder kleure dra – sodat mense haar maklik in ’n skare kan raaksien – en sy’t nie teleurgestel by vanjaar se Royal Ascot nie.

Fergie het sjiek gelyk en kon haar opwinding nie beteuel toe sy die koningin met ’n kniebuiging groet nie. Beatrice het ’n rok deur The Fold gedra.

OULIKE PAARTJIES

Meghan, die hertogin van Sussex, het gehou by die ontwerper van haar trourok in haar wit hemprok deur Givenchy met ’n swart-en-wit hoed deur Philip Treacy, en manlief Harry op dag een het aantreklik gelyk met ’n keil.

Camilla, die hertogin van Cornwall, het op dag twee een van haar geliefkoosde mentgroen jasse gedra saam met haar kenmerkende pêrelhalssnoer, en prins Charles was deftig in ’n duifgrys oggendpak.

Die Amerikaanse voetbalspeler Russell Wilson en sy vrou, die R&Bsangeres Ciara, was ’n verrassing op dag drie. Ciara het heel tuis gelyk in ’n wit rok deur Edeline Lee saam met ’n hoed deur Philip Treacy.